DILI, 21 Jullu 2026 (TATOLI)-Vise-Primeiru-Ministru, Ministru Koordenadór ba Asuntu Sosiál no Ministru Dezenvolvimentu Rurál no Abitasaun, Mariano Assanami Sabino, husu ba Tatoli katak atu hametin nia papél hanesan ajénsia notisioza estatál ne’ebé tranzmite informasaun kredivel no defende povu nia lian, tuir mandatu Konstitusaun.
Mensajen ida-ne’e hato’o iha okaziaun aniversáriu da-10 Ajénsia Notisioza Timor-Leste Tatoli (27 Jullu 2016- 27 Jullu 2026).
Assanami hato’o parabéns ba ekipa Tatoli no apresia kontribuisaun ajénsia ne’e iha hametin demokrasia no dezenvolvimentu nasionál.
“Mídia mak klamar ba demokrasia, sein mídia, demokrasia mate. Tanba ne’e, imi hotu importante ba ita-nia konstrusaun Estadu”, Assanami dehan ba Tatoli, ohin.
Nia salienta katak, durante ne’e, nia sempre akompaña notisía sira ne’ebé públika iha Tatoli no nota katak ajénsia ne’e halo ona knaar tuir nia mandatu. Maibé, nia husu atu kontinua se hadi’a an no hametin kapasidade atu responde ba dezafiu sira iha futuru.
Nia fó rekomendasaun importante katak ita tempu ne’ebé teknolojia dijitál avansadu no ema hotu bele fahe informasaun liuhusi plataforma oioin, Tatoli tenke nafatin garante katak notísia sira ne’ebé publika nafatin loos, kredivel no tuir padraun jornalístiku.
“Dalaruma ema hanoin sala mak informasaun ho notisía ne’e hanesan, maibé informasaun ne’e fake bele iha, maibé notisía ne’e laiha fake news, tanba notisía iha adraun ne’ebé loos. Entaun, informasaun mak bele falla maibé notisía nunka falla. Tanba ne’e mak tenke kontinua kaer imi-nia étika, stadar operasionál ne’ebé di’ak atu sai ajénsia ne’ebé forte, kredivel no akomoda informasaun oin-oin, bele fahe ba mídia sira seluk”, nia hato’o.
Notísia relevante: PM Xanana enkoraja TATOLI kumpre obrigasaun fó sai informasaun loloos ba povu
Jornalista: Arminda Fonseca
Editora: Maria Auxiliadora
