SEFOPE husu traballadór 54 labele halai sai husi sistema
DILI, 13 Juñu 2025 (TATOLI) — Sekretaria Estadu Formasaun Profisionál no Empregu (SEFOPE), sesta ne’e hala’o serimónia despedida ba traballadór hamutuk 54 atu serbisu iha Korea durante tinan-haat no fulan-sanulu no husu atu labele halai sai husi sistema.
Husi traballadór timoroan na’in-54 komposta husi feto na’in-ida no restante mane.
Traballadór hirak-ne’e atu serbisu iha área peska, agrikultura no fábrika ho durasaun kontratu tinan haat, fulan-sanulu.
Xefe Gabinete SEFOPE, Jacinto Ribeiro Dias, fó hanoin ba traballadór hirak-ne’e katak nafatin kumpri sistema ne’ebé mak Governu rua halo ona kooperasaun, tanba ne’e tenke serbisu ho responsabilidade.
“Tanba nasaun haruka nia ema ba, atu sai fatór importante ba ekonomia rai laran no ekonomia nasaun, tanba ne’e husu nafatin mantein Sistema, labele sai husi sistema, tanba banhira ita sai husi sistema implika ba empregadór sira,” Xefe Gabinete SEFOPE, Jacinto Ribeiro Dias hateten ba jornalista sira iha Timor Logde.
Nia husu ba família sira katak traballadór sira ba serbisu tenke rai sira-nia osan ho di’ak atubele halo buat ruma iha família nia leet.
Traballadora Leonilda Fernandes, agradese ba Governu, tanba fó ona oportunidade ba nia atu serbisu iha Korea durante tinan haat no fulan-sanulu.
“Hau agradese ba Governu, tanba ha’u-nia feto maluk barak hakarak hetan oportunidade hanesan ha’u, maibé to’o agora sira la hetan, entaun oportunidade ida ne’ebé ha’u hetan ne’e atu ba serbisu iha korea durante tinan haat, fulan-10 iha área fábrika nian,” Leonilda Fernandes, informa.
Nia dehan, serbisu saida de’it dezafiu sempre iha maibé la hamate vontade, nafatin hasoru no fiar katak hakat neneik atubele hadi’a ekonomia família nian.
Traballadór Moisés da Silva, agradese ba Governu ne’ebé fó ona oportunidade atu ba servisu iha Korea.
“Ami agradese ba parte hotu ba prosesu sira-ne’ebé to’o mai iha etapa ohin loron no husu ita boot sira-nia suporta mai ami, atu serbisu di’ak iha ema-nia rain,” Moisés da Silva, konklui.
Notisia relevante: SEFOPE despede traballadór 104 atu ba servisu iha Korea
Jornalista : Felicidade Ximenes
Editór: Evaristo Soares Martins
