KOVALIMA, 12 Juñu 2025 (TATOLI) – Ekipa husi Servisu Munisipál Obra Públika (SMOP), Kovalima identifika ona pontuasaun estrada ne’ebé kotu nune’e presiza halo normalizasaun.
Diretór Servisu Munisipál Obra Públika Kovalima, Sidónio Gusmão informa katak pontuasaun estrada ne’ebé aat grave no kotu mak hanesan iha Postu administrativu Tilomar iha área Halis, área iha Maubesi estrada liga ba Postu administrativu Fatumea no estrada husi Suai liga ba iha postu Maukatar área Tunamaus no Lela.
Estrada ne’ebé kotu iha Postu administrativu Tilomar mak iha parte Halis maske halo ona normalizasaun maibé kontinua kotu. Tan ne’e, kontinua kontaktu ona Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI,I.P, sigla portugés) atu halo normalizasaun estrada ne’ebé mak kotu.
“Ita identifika no nota estrada hirak ne’ebé aat grave presiza halo normalizasaun. Maibé, daudaun ne’e, ekipamentu pezadu halo normalizasaun estrada iha Maubessi”, Dirijente Obra Públika Kovalima Sidónio Gusmão, relata ba TATOLI, iha resintu AMC, ohin.
Pontuasaun estrada iha Maubessi estrada ne’ebé komunidade Fatumea hala’o movimentu ho transporte privadu no públiku ba mai, estrada Postu administrativu Maukatar iha parte Tunamaus no iha aldeia Lela, suku Holpilat ne’e grave tanba ne’e SMOP halo hela koordenasaun.
Hafoin ekipamentu pezadu normaliza estrada iha Maubesi, ekipamentu pezadu kontinua normaliza estrada iha postu Maukatar bazeia ba pontuasaun estrada ne’ebé mak kotu durante iha tempu udan.
Aleinde ne’e estrada iha Bemean liga husi Postu administrativu Zumalai ba iha munisípiu Bobonaro, tanba SMOP Kovalima iha kbiit naton.
Notísia relevante: https://tatoli.tl/2025/06/02/empreza-wtj-normaliza-estrada-kotu-husi-tilomar-liga-ba-postu-rua/
Jornalista:Celestina Teles
Editór: Rafael Ximenes de A. Belo
