DILI, 13 Juñu 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Falur Rate Laek, hala’o enkontru kortezia ho Xefe Estadu Maiór Jenerál Ezérsitu Australianu, Tenente Jenerál, Simon Stuart no Xefe Estadu Maiór Jenerál Nova Zelándia, Rose King, hodi aborda kooperasaun serbisu ba kontribuisaun pás no estabilidade.
Tenente Jenerál, Falur Rate Laek, hateten, durante enkontru diskute kona-ba kooperasaun ne’ebé hala’o ona.
“Ita nafatin husu sira atu apoiu serbisu hodi lori ita-nia pensamentu kontribuisaun ba pás no estabilidade mundu, ne’ebé ita tenke lori iha forma hotu. Tanba ne’e nu’udar timoroan tenke defende pás iha mundu,” Tenente Jenerál hato’o iha salaun enkontru Kuartel Jenerál F-FDTL, Fatuhada, Sesta ne’e.
Iha fatin hanesan, Xefe Estadu Maiór Jenerál Ezérsitu Australianu, Tenente Jenerál, Simon Stuart, hateten, ninia prezensa atu haree kona-ba benefísiu ba kooperasaun husi parte rua ne’ebé laiha limitasaun.
“Ita tenke serbisu hamutuk nafatin ho kompromisu ne’ebé hanesan hodi garante pás ba nasaun ida-idak inklui rejiaun ne’ebé mak iha prosperiedade ba povu atu labele fó risku ba populasaun sira,” nia subliña.
Notísia relevante : PM Xanana apresia joven sira kontribui ba pás no estabilidade
Tenente Jenerál Simon sente previléjiu no kontente bele filafali mai iha Timor hodi hasoru malu filafali ho Tenente Jenerál Falur no maluk F-FDTL sira ne’ebé mak serbisu hamutuk durante tinan 26.
“Ita-nia povu sira-nia taxa kontribuisaun ne’ebé fó mai ita hanesan seguransa ba nasaun, presiza halo povu satisfaz ho ita-nia serbisu entre nasaun tolu ne’e. Tanba ne’e, nia xave prinsipál ba kooperasaun mak hamutuk ita bele serbisu di’ak atubele lori nasaun ne’e bá oin,” nia katak.
Tenente Jenerál Simon, haktuir, nia mai Timor-Leste iha momentu INTERFET nian no nia vizita ba Timor dala-tolu ona.
“Ha’u sempre haree progresu kada tempu ne’e melloradu loos. Buat sira-ne’e hotu tanba ita-nia kooperasaun ne’ebé sufiztifikadu liu ba área sira ne’ebé ita presiza hadia di’ak liután. Importante mak ita-nia amizade no relasaun ne’ebé iha dezde uluk to’o agora,” nia katak.
Tuir planu Austrália sei halo proposta ida atu kontinua mellora serbisu hamutuk ba estabelesimentu área Komponente Forsa Terrestre Baukau ho Nova Zelándia. Nune’e propostan ne’e sei tau iha enkontru bilaterál hafoin bele diskute, atu nune’e bele halo programa no ajenda ba impelementasaun.
Jornalista : Alexandra Da Costa
Editora : Julia Chatarina
