DILI, 13 Juñu 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Falur Rate Laek, iha inisiativa atu estabelese diresaun foun ida.
“Ha’u sei halo diresaun ida para regula komportamentu forsa hotu nia operasaun seguransa no mídia militár nian, ema ne’ebé iha kompeténsia mak bele halo publikasaun, selae militár hotu naran halo publikasaun antes ha’u Xefe Estadu Maiór mós la hatene,” Tenente Jenerál Falur hateten ba jornalista sira iha Kuartel Jenerál, Fatuhada, Sesta ne’e
Aleinde ne’e, Tenente Jenerál sei kria komisaun halo investigasaun kle’an ba Militár ida hakotu iis iha Oékusi.
“Atu kria komisaun husi komponente NAVAL liuhusi Inspetór Jerál mak sei lidera husi parte hotu hanesan área justisa no saúde hodi halo investigasaun profunda ba kauza prinsipál husi asidente ne’ebé foin lalais akontese iha rejiaun Oékusi, nune’e Inspetór ne’e bele halo investigasaun kle’an kona-ba operasaun seguransa arma ninian,” nia akresenta.
Inspetór Jerál ne’e mós sei introdús regra jerál sira iha Militár inklui medida preventiva atu eduka Militár.
“Tenke iha regra ida ba utilizasaun arma, katak tempu saida mak Militár sira bele hatama bala musan, maneira deskarega ne’e oinsá ne’e sei hanorin hotu, nomós norma ba ezekusaun permanente ne’e iha para loron-loron ne’e Militár sira atu kumpre saida. Nune’e diresaun ne’e pasa informasaun ba Kaza Militár, hafoin kontinua pasa kuñesimentu ba Komandante Supremu nune’e bele define medida preventiva saida mak Xefe Estadu Maiór Jenerál bele halo ba asaun oho-an ida-ne’e. Entaun Inspetór Jerál nia serbisu sei halo medida preventiva atu eduka Militár sira-nia mentalidade atu prepara-an bainhira enfrenta situasaun hanesan ne’e hodi rezolve problema ho di’ak.
Notísia relevante : Komandu F-FDTL sei investiga motivu membru Reinaldo Ximenes mate iha Oekusi
Tenente Jenerál konsidera akontesimentu ba Militár ida iha Oékusi hanesan oho-an.
“Ha’u konklui ne’e hanesan suisídiu ida tanba tanba dalaruma mós ligadu ba ninia família balun, ne’ebé oho-an ita tempu uluk ona, entaun buat sira-ne’e hotu ha’u la hatene, depois investigasaun mak ita haree. Tanba iha postu ne’ebá mós la’ós atu kaer kilat se tun sa’e tanba operasaun seguransa ne’e iha regra katak, iha sá oras saida mak bele hatama kilat musan no buat hotu sei tuir orientasaun husi Komandate,” nia katak.
Xefe Estadu Maiór la hatene kona-ba motivu Militár ne’e hakotu iis.
“Ha’u la hatene nia intensaun no informasaun ne’ebé ha’u rona katak karregadór laiha no bala musan ne’e rasik mak iha laran, entaun posivelmente operasaun seguransa mak ladún profisionál tanba bainhira halo operasaun seguransa mak deskarega ne’e tenke haree hodi tiru sa’e ka tiru tuun atu komprova dehan bala musan ne’e iha laran. Maibé dehan karregadór laiha,” nia tenik.
Tenente Jenerál seidauk simu relatóriu ofisiál husi kazu Militár mate iha Oékusi maibé relatóriu husi mídia no verbál husi Komandate mak envia ona tanba sei iha prosesu investigasaun, nune’e nia haruka ona dirativa ne’e para hatan no halo deklarasaun ofisiál kona-ba kazu ne’e.
Jornalista : Alexandra da Costa
Editora : Julia Chatarina
