DILI, 14 Juñu 2025 (TATOLI)-Prezidente Komisaun Nasionál ba Eleisaun (CNE, sigla portugés), José Agostinho da Costa Belo, husu ba Partidu Demokrátiku (PD) tenke realiza kongresu nasionál, nune’e bele partisipa eleisaun sira tuir-mai hanesan eleisaun Prezidensiál no Parlamentár.
“PD seidauk halo kongresu, entaun ami-nia prezensa atu haree mós prosesu ida-ne’e, nune’e hili lideransa sira ne’ebé futuru ho vizaun di’ak hodi konstrui Nasaun ho di’ak”, José Agostinho da Costa Belo hatete iha aniversáriu ezisténsia PD ba da-24 ho tema Hametin Partidu Hodi Serbi Povu no Estadu” iha Kolmera, sábadu ne’e.
Nia subliña, CNE mós daudaun halo programa preparasaun ba eleisaun munisipál, Prezidensiál no Parlamentár, entaun foin lalais iha loron 10 Juñu 2025 CNE halo programa importante mak edukasaun sívika muda nia modelu uituan, fó oportunidade ba prezidente partidu polítiku sira iha nivel munisípiu halo debate entre sira atu koñese liután katak fini ne’e la’ós iha nasionál de’it.
Nune’e husu PD atu kumpre lei númeru 2/2016, ne’ebé obriga partidu polítiku sira-neʼebé rejistadu realiza kongresu nasionál.
Antes ne’e Prezidente CNE esplika ona importánsia husi kongresu nasionál tuir lei númeru 2/2016, 3 Fevereiru (Lei partidu polítiku), artigu 19 (Kongresu no Konferensia Nasionál partidu sira) númeru 1 hateten, partidu polítiku sira bele kria órgaun ne’ebé julga nesesáriu ba prosekusaun objetivu, pelumenus órgaun sentrál reprezentativu ida ho funsaun deliberativa.
Númeru 2 hosi artigu ne’e hatutan, Kongresu ka Konferénsia Nasionál partidu nian ne’e aas liu órgaun deliberativu nível nasionál, pelumenus dois terços hosi delegadu sira-ne’ebé diretamente eleitu hosi respetivu sírkulu partidáriu, asegura ho partisipasaun no reprezentatividade hosi baze.
Nune’e mós númeru 3 dehan, Kongresu ka Konferensia Nasionál iha kompeténsia eskluziva ne’ebé prosede ba aprovasaun estatutu no programa polítiku.
Númeru 4 hosi artigu 19 ne’e akresenta, Kongressu ka Konferensia partidu nian tenke halo másimu tinan haat (4) dala-ida.
Hatan ba kestaun ne’e, Prezidente PD, Mariano Asanami Sabino, hatete orienta ona Komisaun Organizadora atu hahú kongresu maibé tuir kultura PD nian tenke hahú ho konferénsia husi postu administrativu sira, kontinua iha munisipál mak realiza kongresu nasionál.
Nia esplika data fiksu seidauk hatene maibé planu konferénsia no kongresu nasionál sei hala’o iha tinan ne’e, bainhira konferénsia postu administrativu no munisipál hotu ona kontinua kedas kongresu nasionál tanba kongresu ne’e atu konsolida forsa sira ne’ebé husi kraik.
Tuir nia PD mós sei halo preparasaun figura kandidatu ba eleisaun sira tuir mai hanesan eleisaun Prezidensiál no Parlamentár, nune’e partidu rasik sei hili kandidatu ne’e bele iha kongresu nasionál ka depoiz kongresu sei halo konvensaun hodi deklara kandidatu Prezidente.
Nia salienta atu sai Prezidente Repúblika la’ós tenke Prezidente Partidu ka Sekretáriu Jerál Partidu, bele militante ida maibé iha konvensaun ne’e maka bele deside, liuhusi konvensaun ne’e modelu kandidatu rua entaun liuhusi eleisaun maibé baibain buka hodi halo kompromisu, konsiénsia, no akordu atu kandidatu ida de’it, hothotu bele fó apoiu.
Nia afirma eleisaun sira tuir nia parte sei la kandidata-an maibé nia parte sei konsentra liu ba governasaun.
“Ne’ebé ha’u sei husu ba militante sira para la’ós Prezidente Partidu maibé bele haree kuandu di’ak sira iha partidu bele sai kandidatu”, konklui.
Notisía relevante : https://tatoli.tl/2021/09/16/lei-obriga-partidu-politiku-sira-tenke-realiza-kongresu-nasional/
Jornalista : Arminda Fonseca
Editora : Rita Almeida
