Prezidente Repúblika husu PD prepara-an partisipa eleisaun sira
DILI, 14 Juñu 2025 (TATOLI)-Prezidente Repúblika, Ramos Horta, husu ba Partidu Demokrátiku (PD) atu prepara-an partisipa eleisaun sira ne’ebé sei mai hanesan prezidensiál iha 2027 no parlamentár 2028.
Xefe Estadu ne’e hatete nia admira PD tanba partidu ida ne’ebé eziste tinan 24 ona, maske hasoru dezafiu oioin maibé aguenta to’o agora.
“Ha’u simpatia ho imi, ha’u fiar partidu ida-ne’e tenke aguenta, tanba ita haree partidu kiik barak mosu la aguenta, entaun demokrasia no Governasaun barak iha rai-ne’e depende mós ba imi PD, entaun organiza-an didi’ak, forma kuadru halo didi’ak hodi partisipa eleisaun sira”, Ramos Horta hateten iha aniversáriu ezisténsia PD ba da-24 ho tema “Hametin Partidu Hodi Serbi Povu no Estadu”, iha Kolmera, sábadu ne’e.
Nia husu prepara kuadru partidu ne’ebé hatene ekonomia, jestaun no hatene oinsá foti desizaun, nune’e futuru labele halo moe Nasaun kuandu tama ona ASEAN. Alende ne’e, hatudu matenek no disiplina liuhusi reuniaun ruma labele falta no tarde, partisipa reuniaun sira, debate sira, estuda dokumentu sira hanesan orsamentu nune’e bele hatene foti desizaun.
Biban hanesan, Primeiru-Ministru, Kay Rala Xanana Gusmão, felisita ezisténsia PD nian ne’ebé lee husi Sekretáriu Jerál Interinu PD, Francisco Borolaku.
Pontu importante husi mensajen ne’e mak konsolidasaun demokrátika ba Estadu no Nasaun hodi garante armónia no estabilidade nasionál.
Istória PD nian iha ligasaun ho kór oioin ba país ne’e nia istória. Istória ne’ebé nakukun ho aktu korajen no hamutuk hodi halo esforsu ba propózitu ka objetivu komúm, hanesan harii país ida ne’ebé forte no dezenvolvimentu timoroan tomak bele hetan oportunidade atu konkretiza mehi ho aspirasaun.
Iha loron espesiál ne’e, atuál Prezidente Partidu CNRT ne’e hato’o nia saudades boot ba Fundadór PD, saudozu Fernando Lasama de Araújo. Hato’o mos rekoñesimentu ba estrutura tanba kaer metin vizaun fundadór Fernando Lasama de Araújo, no rekoñese mós dedikasaun hodi fó lian ba grupu barak no timoroan tomak ne’ebé hakarak kontribui ba dezenvolvimentu nasionál, hodi garante diversidade ideia, valór projetu ba país.
Prezidente PD, Mariano Asanami Sabino, hateten ezisténsia PD hakarak hatutan espíritu funu na’in sira nian hodi konstrui Estadu direitu demokrátiku, ida-ne’e mak kompromisu.
“Ami-nia ezisténsia la’ós tanba partidu foun laiha no ami-nia ezisténsia la’ós atu kompete, maibé ami mai hakarak kaer prinsípiu ida ne’ebé proklamasaun 28 Novembru proklama Repúblika Demokrátika Timor-Leste ne’e tenke sai lisan ba ulun, no lisan ba moris nu’udar sidadaun, povu Repúblikanu ne’ebé orijen demokrátiku”, Asanami afirma.
Aniversáriu ne’e hetan partisipa mós husi Prezidente CNE, José da Costa Belo, Jenerál Lere Anan Timur, Prezidente Konsellu Kombatente Libertasaun Nasionál, Riak Leman, reprezentante Parlamentu Nasionál, no seluk tan.
Notísia relevante: CNE husu PD tenke realiza kongresu nasionál
Jornalista : Arminda Fonseca
Editora : Rita Almeida
