Sentidu solidariedade husi Kuba ba Timor-Leste forte to’o agora
DILI, 15 Juñu 2025 (TATOLI)-Primeiru-Ministru (PM), Xanana Gusmão, hatete sentidu solidariedade no amizade husi Nasaun Kuba ba Timor-Leste forte tebes desde uluk to’o agora.
“Kuba Timor nia amigu ne’ebé iha relasaun amizade metin tebes”, Xefe Governu hatete bainhira sai oradór iha semináriu saudasaun aniversáriu loron moris lider istóriku Kuba-nian, Ernesto Che Guevara, iha embaixada Kuba, Motael, sábadu ne’e.
Istória husi Timor-Leste nia luta, Xanana Gusmão dehan hetan inspirasaun husi luta libertasaun Kuba ne’ebé lidera husi Che Guevara.
Eis-Prezidente Repúblika ne’e dehan desde Timor ukun-an, Kuba kontinua apoiu liuhusi oferese bolsa estudu ba Timoroan sira iha área medisina ne’ebé ohin-loron asisténsia saúde konsege akontese iha Timor laran tomak.
Kooperasaun hahú husi enkontru ida ho eis-Prezidente Repúblika Kuba nian, Fidel Castro, akompaña hosi José Ramos Horta momentu ne’ebá hanesan Ministru Negósiu Estranjeiru no Kooperasaun ne’ebé realiza iha Kuala Lumpur, Malázia iha 2003, haktuir nota komunikadu ne’ebé TATOLI asesu.
Brigada médika Kubana, estudante medisina jerál no departamentu edukasaun fízika no desportu Universidade Nasionál Timor Lorosa’e ho entusiazmu aprezenta pergunta prinsipál konaba legadu Che Guevara ne’ebé husik hela.
Resposta husi lider rezisténsia Timorense, Kay Rala Xanana Gusmão, konsidera Che Guevara husik hela sentidu umanizmu liuhusi misaun médiku sira ne’ebé halo atendimentu ba pasiente sira ho fuan
Embaixadora Kuba iha Timor-Leste, Grisel Alina Aldama Innis, agradese ho prezensa Primeiru-Ministru nian iha eventu ne’e no konsidera hanesan onra ida hodi komemora hamutuk loron moris Ernesto Che Guevara nian.
Diplomata ne’e agradese mós ba esperiénsia sira ne’ebé partilla hamutuk ona no bele sai hanesan referénsia atu hametin liu-tán kooperasaun bilaterál entre nasaun rua iha futuru.
Ernesto Che Guevara moris iha 14 Juñu 1928 no mate iha Outubru 1967, durante nia viajen moris, Che Guevara hanesan revolusionáriu marxista Argentinu, médiku, eskritór, líder guerrilleiru, diplomata no teóriku militár.
Notísia relevante: Embaixada Cuba realiza festivál desportu hodi selebra loron kooperasaun bilaterál ho TL
TATOLI
