Embaixada Cuba realiza festivál desportu hodi selebra loron kooperasaun bilaterál ho TL
DILI,01 juñu 2924 (TTAOLI)—Embaixada Cuba iha Timor-Leste realiza festivál desportu hanaran Cayman to Cayman, hodi selebra tinan 22 relasaun bilaterál ho Timor-Leste.
Embaiaxadora Cuba ba Timor-Leste, Grisel Aldama Iniss, hateten atividade ne’e nu’udar afirmasaun ida atu hametin liután relasaun bilaterál entre país rua ne’ebé la’o dezde restaurasaun independénsia Timor-Leste to’o ohin loron ne’ebé kompleta ona tinan-22.
“Cuba nu’udar nasaun daruak ne’ebé Timor- Leste rekoñese, nune’e ita hato’o parabéns ba Timor-Leste nia aniversáriu 22 restaurasaun independénsia, ne’ebé hanesan mós estabelesimentu relasaun entre país rua, inklui rezultadu Eleisaun Parlamentár foin lalais ne’e,” Grisel dehan durante halo intervensaun iha festivál desportu, iha resintu Ministériu Juventude Desportu Arte no Kultura (MJDAC ), Lecidere, sábadu ne’e.
Atividade hahú ho la’o ain saudável, hahú hosi Embaixada Cuba, Farol to’o iha MJDAC, ne’ebé partisipa hosi entidade oin-oin.
Festivál ne’e ideia husi MJDAC hamutuk ho Embaixada Cuba, ne’ebé sempre hetan apoiu hosi Reprezentante ONU hanesan Oraganzasaun Mundial Saúde (OMS)iha Timor-Leste.
“Timor-Leste no Cuba hanesan illa rua ne’ebé iha forma jeográfika hanesan Cayman ida, maske lokaliza iha atitude diferente, maibé mai ho pensamentu ida atu oferese bem-estar no dezenvolvimentu ba populasaun. Ho ida-ne’e, Cuba apoiu hodi kumpre objetivu dezenvolvimentu sira ne’ebé Timor-Leste estabelese hodi atinje meta ba ajenda 2030 nian. Agradese ba kooperasaun no interese hosi autoridade sira, ba relasaun bilaterál entre país rua,” Embaixadora afirma.
Selebrasaun loron amizade país rua ne’e iha tempu hanesan selebra mós loron moris Ernesto Guevara, koñesidu liu ho naran Che Guevara, ne’ebé nu’udar sidadaun Argentina-Cubanu, hanesan revolusionáriu, polítiku, soldadu, jornalista, hakerek-na’in no funu-na’in, guerilla tanba ho nia pensamentu revolusionáriu mak konsege hola parte iha funu armadu iha foho Sierra Maestra.
“Nia la’ós de’it hanesan mane ho ideia kle’an, maibé mós ho asaun, ne’ebé la’ós de’it luta ba liberdade povu Cuba nian, maibé mós luta ba povu seluk nia independénsia. Tanba ne’e mak merese hetan domin no respeitu boot,” nia esplika.
Nune’e, Embaixadora komprometidu sei kontinua apoia Timor-Leste iha kualker área kooperasaun nian.
“Pensamentu hosi Che Guvera rasik, ne’ebé dehan revolusionáriu loos ne’e dirije husi sentimentu domin boot, ne’ebé ha’u hatutan tan katak Cuba la oferese buat ne’ebé sei iha, maibé fahe buat ne’ebé nia iha, tanba ne’e mak ami sei kontinua fó apoiu ba ami-nia país irmaun,” Grisel informa.
Iha fatin hanesan, Ministru MJDAC, Nelio Isaac Sarmento , hateten, eventu ne’e realiza ba dahaat, ba tinan ne’e atu komemora relasaun bilaterál país rua ba dala-22.
“Depois ita ukun-an hahú hosi restaura ita-nia independénsia, Cuba sempre iha ita-nia sorin. Cuba nu’udar nasaun ne’ebé iha relasaun di’ak tebes dezde Timor-Leste desde restaurasaun independénsia, médiku no soldadu Cubanu ho bata mutin mai halo tratamentu ba timor-oan sira to’o iha área remota,” Nelio Isaac dehan.
Aleinde ne’e, liuhosi kooperasaun bilaterál, Governu Timor-Leste haruka timor-oan sira bá estuda medisina iha Cuba no Governu Cuba konsege forma timor-oan sira estuda no to’o agora timor-oan barak mak sai ona médiku.
Nune’e mós, Governu Cuba liuhosi profesór Cuba iha Timor konsege ajuda inan no aman analfabetu no Cuba mos ajuda harii fakuldade medisina no apiou professora ba desportu iha Universidade Nasionál Timor-Leste (UNTL).
“Cuba hato’o prontidaun hodi ajuda Timor-Leste dezenvolve desportu iha Timor-Leste tanba Che Guevara no Fidel Castro konsidera desportu la’ós hanesan atleta maibé ne’e direitu ba ema hotu hosi ema kiik, joven to’o katuas no ferik sira, ho nune’e halo exesersiu liuhosi atividade desportu oin oin hodi moris saudavel iha ita-nia sosiedade,’’ nia konklui.
Jornalista : Felicidade Ximenes
Editór: Florencio Miranda Ximenes
