DILI, 16 Juñu 2025 (TATOLI)-Reitór Universidade Nasionál Timor-Lorosa’e (UNTL), João Soares Martins, hatete ekipa UNTL hahú halo investigasaun ba irregularidade administrasaun iha Fakuldade Medisina Siénsia Saúde (FMCS-sigla portugés).
“Sira halo hela sira-nia servisu, ne’ebé ita hein hela relatóriu husi komisaun ka ekipa sira ne’e, hodi bele rezolve problema hirak-ne’ebé iha UNTL”, João Soares Martins dehan ba TATOLI iha Komisaun Nasionál ba Eleisaun (CNE, sigla portugés), Kaikoli, ohin.
Reitór hatutan estrutura ne’e kompostu husi dosente no estudante sira iha UNTL, estabelese ho dekretu lei númeru 16/2010, katak hanesan universidade públika, ne’ebé vinkula ho prinsípiu legalidade, hodi garante funsionamentu hotu, tuir regra ka regulamentu no baze fundamentál ida, nu’udar matadalan ba komunidade akadémika tomak, hanesan profesór, dosente, estudante ka estrutura xefia hotu-hotu iha UNTL, tenke kumpri no obedese ba norma legál sira.
Portavós Asosiasaun Akadémika Estudantil (AAE-FMCS), Germano dos Santos Moreira, husu ba magnifiku reitór UNTL atu foti medida urjenti ba kazu irregularidade hodi fó xamada ba dekana FMCS no diretór departamentu parteira, ne’ebé tenta ignora kazu ne’ebé estudante sira hasoru.
“Husu ba magnifiku reitór atu urjentimente loke prosesu disiplinár hasoru diretór Departamentu Eskola Superior Teknolojia Saúde”, dehan nia.
Notísia relevante: Problema iha Fakuldade Medisina, Reitór UNTL husu aprezenta baze no evidénsia
Jornalista : Osória Marques
Editora : Rita Almeida
