Ema na’in-126 husi munisípiu lima afetadu dezastre naturál durante loron 09-15 Juñu 2025
DILI, 16 Juñu 2025 (TATOLI)–Autoridade Protesaun Sivíl (APC, sigla portugés) liuhusi Gabinete Relasaun Esterna no Komunikasaun kontinua rejista kazu dezastre naturál iha territóriu nasionál, ne’ebé divulga kada semana, fó sai katak ema na’in-126 afetadu ba dezastre naturál iha munisípiu lima durante loron 09 15 Juñu 2025.
“Kazu dezastre naturál ne’ebé akontese hanesan anin sobu uma sia, rai-halai ida, ema mate ida, ahi-han uma tolu, bee-sa’e sia, uma hetan afetadu ualu, númeru ema hetan afetadu 126. Dezastre ne’e akontese iha munisípiu Baukau, Bobonaru, Ermera, Manufahi, no Rejiaun Administrativa Espesiál Oékusi Ambeno, hahú husi loron 09 to’o 15 Juñu 2025,” Xefe Sesaun Komunikasaun APC, Genoveva Fermandes Almeida, informa liuhusi konferénsia imprensa, iha edifísiu APC, Kaikoli, Segunda ne’e.
Notísia relevante : APC rejista dezastre naturál neen iha Juñu nia laran
Husi akontesimentu ne’e APC hamutuk ho parseiru sira halo kedas evakuasaun no atribui apoiu emerjénsia.
“Komandante Autoridade Protesaun Sivíl iha kada munisípiu halo kedas levantamentu dadus ba sasán ne’ebé estragu no lakon,” nia akresenta.
APC atribui ona materiál kontrusaun no hamenus risku dezastre naturál ba munisípiu 11, enkuantu Oekusi no Vikeke seidauk hetan.
“Iha tempu badak nia laran APC sei kontinua apoiu materiál konstrusaun sira ba territóriu nasionál hodi apoiu serbisu sira iha baze,” nia katak.
Jornalista : Alexandra da Costa
Editora : Julia Chatarina
