DILI, 16 Juñu 2025 (TATOLI)—Estudante na’in-50 husi Eskola Sekundáriu Tékniku Vokasionál (ESTV) Bekora, Segunda ne’e, partisipa iha formasaun koezaun sosiál ba rezolusaun konflitu, ne’ebé organiza husi organizasaun naun-governamentál Haburas Dezenvolvimentu Talentu (HADEZTA) ho kolaborasaun husi Ministériu Edukasaun (ME).
Diretór Jerál Ensinu Sekundáriu husi ME, Deolindo da Cruz, hateten, objetivu realiza programa ne’e atu transmite formasaun ba estudante sira hodi kontribui ba pás no promove koezaun sosiál ba konflitu.
“Iha formasaun ne’e oradór sira sei esplika matéria ba estudante sira, oinsá atu hadook-an husi problema, maneira rezolusaun ba problema, katak labele ho violénsia,” Diretór informa ba jornalista sira iha salaun Eskola ESTV Bekora.
Tuir Dirijente ne’e, estudante tenke konsentra ba sira-nia estudu atubele kontribui ba dezenvolvimentu ba rai.
“Ami mós hakarak kontinua sensibiliza formasaun ne’e iha baze, maibé tanba bazeia ba proposta husi parseria hanesan serbisu pilotu ida, tanba ne’e mak hili de’it eskola balun de’it,” nia akresenta.
Diretór programa HADEZTA, Ángelo Fernandes Ximenes, hateten, presiza envolve joven sira iha formasaun sira-ne’ebé bele hakbiit sira-nia kapasidade hodi hamenus konflitu iha eskola no sosiedade.
“Formasaun ida-ne’e labele para iha ne’e de’it, maibé ita presiza kontinua servisu hamutuk hodi mellora formasaun sira-ne’e iha baze atu redús konflitu,” nia katak.
Notísia relevante : HADEZTA organiza formasaun rezolusaun konflitu ba estudante Eskola ESJ Finantil
Diretora Eskola ESTV Bekora, Benedita de Almeida, hato’o, formasaun ne’e hanorin mós estudante sira atu jere problema rasik. Nune’e, HADEZTA garante husi formasaun ne’e bele muda estudante sira-nia hanoin no atitude.
“Eskola agradese tebes ba HADEZTA tanba bele apoiu ona Ministériu Edukasaun nia serbisu hodi sensibiliza matéria estra-kurrikulár ba estudante sira,” nia tenik.
Biban ne’e, Diretor Eskola husu ba estudante sira atu partisipa másimu tanba formasaun ne’e bele muda karakterístika, tanba estudante sira-ne’e ho idade produtivu nune’e dalaruma gosta envolve iha konflitu sira.
Estudante Eskola ESTV Bekora ne’ebé daudaun ativu hela hamutuk 1.342, husi departamentu neen hanesan konstrusaun sivíl, mekániku, automovél,eletrisidade, elegrónika ETI no departamentu jerál.
Atividade ne’e hanesan kontinuasaun husi formasaun dahaat nian, ne’ebé antes ne HADEZTA realiza ona iha eskola tolu hanesan Eskola Ensinu Sekundáriu Jerál (ESJ) 04 de Setembru, ESJ Finantil, Eskola 10 de Dezembru.
Formasaun ne’e hala’o durante semana ida no hetan fundus husi Programa Nasaun Unida ba Dezenvolvimentu (UNDP, sigla inglés).
Jornalista : Alexandra da Costa
Editora : Julia Chatarina
