DILI, 16 Juñu 2025 (TATOLI)-Estudante parteira husi Universidade Katólika Austrália (ACU, sigla inglés) hamutuk na’in 10 halo vizita estudu iha Fakuldade Medisina Siénsia Saúde (FMCS, sigla portugés), Universidade Nasionál Timor Lorosa’e (UNTL) durante semana rua.
Dekana FMCS, Lidia Gomes, hatete durante estadia estudante sira ne’e sei fahe esperiénsia ba malu konaba kultura nasaun rua ne’e nian.
“Ami-nia parseirru mai halo vizita hodi fahe esperiénsia ho estudante Medisina Timoroan sira kona-ba kultura entre Austrália ho Timor-Leste nian”, Dekana FMCS dehan ba jornalista sira iha UNTL, segunda ne’e.
Alende ne’e estuda mós kona ba abilidade oinsá fahe esperiénsia ba-malu hodi fó asisténsia ka kuidadu ba inan no bebe sira ne’ebé foin moris.
Nia dehan, estudante sira ne’e sei halo atividade vizita ba ospitál hodi haree oinsá estudante sira halo prátika iha ospitál inklui sentru Saúde sira iha nasionál no munisípiu.
Antes tun ba munisípiu sira, nia dehan halo uluk vizita ba HNGV, sentru saúde Vera Kruz inklui laboratóriu UNTL hodi haree estudante sira antes ba prátika tenki hadi’a uluk abilidade, prátika uluk iha laboratóriu hafoin tun terrenu.
“Enkoraja estudante sira atu aproveita didiak oportunidade ne’e hodi aprende kona-ba esperiénsia entre nasaun rua nian ne’e, liliu kona-ba abilidade prátika, hadi’a diak liu tan kuidadu saúde inan ho oan iha Timor-Leste”, nia enkoraja.
Dekana ne’e hatutan vizita dahuluk akontese iha 2023.
Iha fatin hanesan, Xefe Grupu Estudante Parteira Austrália, Kate Dawson, hatutan objetivu husi vizita ne’e buka hatene kona-ba kuidadu partu iha Timor-Leste, haree liu kona-ba oinsá kualidade edukasaun iha Timor-Leste, inklui atu haree oinsá servisu hamutuk ho estudante parteira Timor-Leste no estudante parteira Austrália.
“Ami mai atu halo mudansa ba atetude ne’ebé mak estudante Timoran sira iha”, Kate Dawson hatete.
Nia esplika, kooperasaun entre ACU ho UNTL iha kedas ona tinan rua liu ba bainhira sira mai vizita iha tinan 2023, nune’e mai fila fali iha tinan ne’e atu kontinua koopera ho UNTL liliu iha fakuldade medisina nian.
“Importante tebes ba feto bainhira iha esperiénsia atu partu ka fó susu la’ós buat ne’ebé fasil no baibain, entaun presiza tau atensaun, nune’e ho esperiénsia hirak ne’e presiza parteira ne’ebé mak treinadu no forte, nune’e parteira importante tebes, no iha Timor-Leste iha parteira sira ne’ebé mak forte”, nia dehan.
Notísia relevante: UNFPA ho UNTL lansa laboratóriu prátika ba parteira
Jornalista : Osória Marques
Editora : Rita Almeida
