Mota Uagia difikulta movimentu estudante no komunidade
VIKEKE, 16 Juñu 2025 (TATOLI)-Mota iha suku Uagia, postu administrativu Osuu, munisípiu Vikeke, ne’ebé laiha ponte difikulta movimentu estudante no komunidade iha tempu udan.
Estudante Sekundáriu Paralelu Uagia, Noimio José da Silva, husu ba governu atu toma atensaun ba situasaun ne’ebé sira enfrenta, tanba kada tinan sempre akontese.
“Durante ne’e ponte alternativa aat, ne’ebé agora tempu udan, mota tun difikulta ami labele partisipa prosesu aprendizajen. Tempu udan ami labele bá eskola”, dehan estudante ne’e ba TATOLI suku Uagia, ohin.
Iha fatin hanesan, profesór Ensinu Báziku Filiál (EBF) nú 84 Uagia, Elidio Pedro, haktur preokupasaun ne’ebé hanesan.
Nia dehan bainhira mota tun iha tempu udan, ninia parte sempre halo kontaktu ho estudante sira nia inan-aman atu evita dezastre ba alunu sira.
“Kuandu udan no mota tun, estudante sira husi mota sorin labele mai tuir aula, ami kontaktu ba estudante sira nian inan amán no estudante sira katak labele partisipa aula, atu evita dezastre ba estudante sira, meius ida-ne’e mak durante ne’e ami halo”, nia subliña
Mota Uagia iha 2016 komunidade hamutuk autoridade lokál sira inisia halo ponte alternativa iha mota, maibé iha tinan 2021 mota sobu, nune’e to’o agora ponte laiha hodi difikulta estudante no komunidade.
Tuir dadus estudante EBF 84 Uagia no Ensinu Sekundáriu Paralelu Uagia totál hamutuk 314, husi númeru ne’e estudante pursentu 30 mak hela iha mota sorin.
Hatán ba preokupasaun ne’e, Prezidente Autoridade Munisípiu (PAM) Vikeke, Francisco C.S de Gonzaga Soares, hateten bele rezolve tanba mota referida kiik.
“Ha’u sente mota Uagia ne’e distánsia kiik, ita bele revolve. Maibé, autoridade sira mak tenke tau planu postu nian, depois aprezenta ba munisípiu mak ita orienta tékniku sira haree tanba estimasaun orsamentu $500 mil mai kraik kompetensia munisípiu”, nia realsa.
Mota Uagia ho ninia luhan purvolta metro ualu, mota ida-ne’e úniku tanba liga suku Uagia no suku Ossorua, postu administrativu Osuu.
Notísia relevante: Estudante UNPAZ ida mout iha mota Iarabere-Vikeke
Jornalista : Vitorino Lopes da Costa
Editora : Rita Almeida
