SEFOPE no sentru formasaun 24 asina kontratu ba implementa formasaun tolu
DILI, 16 Juñu 2025 (TATOLI)–Sekretaria Estadu Formasaun Profosionál no Empregu (SEFOPE) liuhusi Diresaun Nasionál Formasaun Profisionál asina kontratu ho sentru formasaun 24 ba programa formasaun ho tipu tolu hanesan regular, reforsa institusionál no móvel iha territóriu nasionál.
Diretór Jerál Servisu Koorporativu husi SEFOPE, Nelson Soares Carvalho, hateten, sentru hirak ne’e selesionadu tuir proposta ne’ebé submete ona.
“Sentru formasaun 51 mak mai hatama proposta iha SEFOPE, maibé bazeia ba selesaun husi Komisaun Nasionál Tékniku Avaliasaun Proposta, entaun sira-ne’ebé la prienxe kritéria ita labele kontinua tanba sira-nia dokumentu la kompletu,” Diretór Jerál informa ba jornalista, iha salaun enkontru Beach Garden Otél, Praia dos Coqueiros, Segunda ne’e.
Notísia relevante : SEFOPE husu traballadór 54 labele halai sai husi sistema
Ikus mai iha sentru 24 mak pasa tanba prienxe ona kritéria ba formasaun tolu, ne’ebé fundu ba formasaun ho tipu regular ho montante $7.066, reforsa institusionál $8.680.00, formasaun móvel $7.000, husi totál orsamentu subvensaun públika $163.107.
Tipu formasaun tolumak hanesan :
- Formasaun regulár kompostu husi sentru 15, ne’ebé sei fó apoiu ba sentru formasaun sira hodi fasilita formandu sira iha ne’ebé fó formasaun.
- Formasaun reforsa institusionál kompostu husi sentru ualu, ne’ebé atualiza ekipamentu ba sentru formasaun, liu-liu haree ba área konstrusaun no fasilidade edifísiu.
- Formasaun móvel kompostu husi sentru ida, ne’ebé fó apoiu ba sentru ne’ebé akreditadu ona hodi fornese formasaun iha área oin-oin hanesan ortikultura, agrikultura, ospitalidade no seluk tan.
“Tanba ne’e husu ba sentru formasaun sira hotu atu ezekuta orsamentu ho di’ak tuir proposta ne’ebé mensiona, ho objetivu atu tulun ita-nia joven dezempregu sira hodi bele hakbiit sira-nia an liuhusi formasaun sira,” nia apelu.
Durasaun ba kontratu ne’e balun tinan-ida no balun fulan-neen.
Jornalista : Alexadra da Costa
Editora : Julia Chatarina
