DILI, 16 Juñu 2025 (TATOLI)-Universidade Nasionál Timor Lorosa’e (UNTL) sei halo transferénsia ba estudante ho kondisaun defisiénsia fízika, ne’ebé ativa hela iha Fakuldade Medisina Siénsia no Saúde (FMCS, sigla portugés) ba Fakuldade Siénsia Sosiál (FSS), departamentu Inkluzaun Sosiál.
Dekana FMCS, Lídia Gomes, esplika kritériu eskolla medisina, enfermajen no parteira tenke ho kondisaun saudavel iha fízika, psikólojika no saudavel husi moras sira ne’ebé hadaet, tanba pesoál sira ne’e konsidera hanesan liña frente.
Situasaun hirak ne’e akontese, Lídia Gomes dehan sira-nia parte laiha koñesimentu sobre kondisaun estudante, tanba selesaun halo husi Ministériu Ensinu Superiór.
“Ami konvida ona estudante nia inan-aman halo esplikasaun ba sira katak sai pesoál saúde iha liña frente tenke ema ne’ebé mak saudável para kuidadu fali ema seluk nia moras, se sira mai ho kondisaun fízika ne’ebé la-di’ak, oinsá mak bele halo atendimentu di’ak ba pasiente sira”, nia dehan iha ninia knaar fatin Kaikoli, segunda ne’e.
Nia hatutan estudante ne’ebé sei hetan transferénsia kontinua de’it semester anteriór iha fakuldade foun, no sei lakon matéria sira antes ne’e, tanba matéria jerál iha fakuldade hothotu hanesan.
“To’o semester III mak ita halo transferénsia, no nia bele kontinua ba semester IV”, afirma nia.
Lídia Gomes afirma tan katak dosente sira la halo diskriminasaun ba estudante defisiénsia maibé bazeia ba regulamentu akadémiku UNTL ne’e adapta husi Organizasaun Mundia Saúde (OMS).
“Hanesan dosente hanorin hakfodak haree nia kondisaun, tanba rekrutamentu la’ós ami mak halo, ami la hatene nia kondisaun antes maibé dosente balun hasé tanba hakfodak katak ema ne’ebé defisiente labele tama iha ne’e. La hasé nia iha fatin públika, husu tuir no esplika regra ne’e ba nia. Ema gosta inventa informasaun”, realsa nia.
Reitór UNTL, João Soares Martins, hatete fakuldade halo hela konversa ho estudante no família, iha ona solusaun.
Notísia relevante: Reitór UNTL husu dosente sira la halo diskriminasaun ba estudante sira
Jornalista : Osória Marques
Editora : Rita Almeida
