Xefe Estadu inaugura “Kantina Matak” hodi fó hahan nutritivu ba labarik sira
DILI, 16 Juñu 2025 (TATOLI)–Prezidente Repúblika, José Ramos Horta, segunda ne’e, hamutuk ho Embaxada Australia iha Timor-Leste realiza mini-inaugurasaun ba Kantina Matak, hodi fasilita no fó hahan nutritivu ba labarik sira.
Kantina matak ne’ebé lokaliza iha Palásiu Prezidensiál Dili, harii bazeia ba inisiativa husi Prezidente Repúblika rasik hodi fó ai-haan ne’ebé-nutritivu ba labarik sira-ne’ebé kada loron halimar iha resintu Palásiu Prezidensiál no fó biban mós ba povu kbiit laek sira atu hasoru malu ho Xefe Estadu.
“Ita halo mini-inagurasaun ida ba kantina matak, fatin ida ne’e hodi fó hahan kada loron ba labarik sira. Ida-ne’e, ita hetan apoiu husi Embaixada Austrália iha Timor-Leste sira haruka sira nia Forsa Enjeñeria mak halo reabilitasaun ba kantina ne’e, kria ona kondisaun ne’ebé di’ak,” Ramos Horta hateten ba jornalista sira.
Nia dehan, daudaun ne’e dapur Prezidente Repúblika hodi fornese ai-haan ba labarik sira iha Dili laran hamutuk haat (4) mak ida iha Palásiu Prezidensiál, ida iha Komoro Eskola LABEH, ida iha Lecidere, ida iha Hera no ida iha Reziaun Administrativu Espesiál Oé-Cusse Ambeno (RAEOA).
“Iha fatin sira-ne’e kada loron ita fó han labarik besik 1000. Sira hetan ai-haan hahú segunda to’o sesta, sira han ai-han ne’ebé ho nutrisaun no kualidade di’ak ba saúde,” nia dehan.
Iha okaziaun ne’e, Xefe Estadu alerta ba labarik sira atu fase liman molok han, atu nune’e evita ka hadook labarik sira husi moras.
“Labarik sira tenke fase liman kada loron foin han, sira han tenke modo, naan fresku, ai-fuan no hemu bee barak. Ita haree, problema boot iha Timor-Leste la’ós de’it labarik sira, feto ka mane, boot ka kiik, ladun hemu bee, nune’e mak impaktu ba moras rins barak. Sira tenke hemu bee ne’ebé kualidade,” nia dehan.
Jornalista : Hortencio Sanchez
Editór : Cancio Ximenes
