DILI, 16 Juñu 2025 (TATOLI)—Inspetora Autoridade Inspesaun no Fiskalizasaun Atividade Ekonómika, Sanitária no Alimentár, Odete Viegas, hateten husi fulan-Abríl to’o Juñu, tinan ne’e, ekipa AIFAESA halo ona inspesaun ba estabelesimentu operadór ekonómiku sira hamutuk 826 inklui munisípiu sira.
“Husi Janeiru to’o Marsu, Inspesaun Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) inspesiona ona estabelesimentu hamutuk 400-resin. Agora, ita tama iha trimestre daruak, hahú husi Abríl-Juñu, ita inspesiona fatin estabelesimentu operadór ekonómiku sira-nian hamutuk 826,” Odete Viegas dehan iha nia kna’ar fatin, Matadouru, segunda ne’e.
Nia haktuir, husi operadór ekonómiku 826 ne’e, iha fatin komérsiu ekipa sira inspesiona loja boot sira no kioske hamutuk 638, entretantu fatin indústria ka produsaun hamutuk 43 no fatin turístiku hamutuk 145.
“Agora, husi munisípiu to’o ohin loron ita seidauk inspesiona mak munisípiu tolu hanesan Aileu, Ainaru inklui Dili (Ataúru), maibé ohin ami enkontru ona katak ekipa sei dezloka ba munisípiu sira-ne’e atu bá halo inspesaun,” Odete informa.
Notísia relevante: Durante fulan lima, AIFAESA arrekada reseita rihun $80 ba kofre Estadu
Husi inspesaun sira-ne’e, nia esplika, hetan ona koima husi operadór ekonómiku sira-ne’ebé mak komete irregularidade ka infrasaun hamutuk rihun $103,” nia dehan.
Nia hatutan, operadór ekonómiku sira barak mak hakarak selu voluntáriu, signifika katak sira mós komesa koopera ona ho AIFAESA no rekoñese irregularidade ne’ebé mak sira komete, entaun ida-ne’e lahanaruk ona prosesu.
Odete subliña, kona-ba estabelesimentu ne’ebé AIFAESA deside taka permanente, mak Loja Seara no Empreza Frize.
“Durante tempu hirak-ne’e ita kuaze halo selajen trimestre daruak nian ne’e ita taka temporária operadór ekonómiku sira hamutuk 45 kompostu husi Dili no munisípiu sira seluk,” nia konklui.
Jornalista: Felicidade Ximenes
Editór: Xisto Freitas da Piedade
