DILI, 17 Juñu 2025 (TATOLI)-Primeiru Ministru (PM), Xanana Gusmão, informa Governu sei submete lei atu taka Institutu Públiku (I.P) no Empreza Públika (E.P) ba Parlamentu Nasionál (PN) hodi bele halo diskusaun no aprovasaun.
“Ida mak I.P no E.P sira ne’ebé provoka problema barak. Ne’e mak ha’u husu ona ba Prezidente, ami atu haruka pedidu ida mai iha Parlamentu para taka tiha lei ida-ne’e, anula tiha I.P no E.P sira”, Xanana dehan hafoin enkontru ho Prezidente Parlamentu Nasionál, Maria Fernanda Lay, ohin.
Xefe Governu salienta katak medida ida-ne’e halo atu institutu públiku no empreza públika sira filafali ba situasaun anteriór.
“Membru Governu bele haree, tanba ita husu saláriu oinsá? Ami I.P no E.P ne’e autónomu, depois buat sira ne’e la la’o, gasta osan, ne’ebé taka. Ha’u ko’alia no husu tiha ona ba prezidente, esplika didi’ak ba Prezidente [Parlamentu] para nia bele komprende”, akresenta.
Antes ne’e, Konsellu Ministru hala’o sorumutu iha Palásiu Governu, aprova Projetu Dekretu-Lei, ne’ebé aprezenta husi Ministru Prezidénsia Konsellu Ministru, Agio Pereira, kona-ba Rejime tutela administrativa ba pesoa koletivu públika ne’ebé integra iha Administrasaun Indireta Estadu.
Diploma ida-ne’e atu responde nesesidade hodi uniformiza ezersísiu podér tutela no superintendénsia ba Institutu Públiku sira, nune’e bele garante jestaun ida-ne’ebé efisiente no koordenada liu. Sein prejuízu ba espesifisidade entidade idaidak nian, rejime ida-ne’e estabelese kuadru komún ida ba supervizaun governamentál, hodi asegura koerénsia ne’ebé boot-liu iha atuasaun institutu públiku sira.
Notísia relevante: https://tatoli.tl/2025/03/20/xanana-parte-ida-gasta-osan-estadu-arbiru-mak-i-p-no-e-p-sira/
Rekorde katak deputadu bankada CNRT, Natalino dos Santos, konkorda ho desizaun Governu atu halo avaliasaun ba ezisténsia institutu públiku no empreza públika sira.
“Apresia medida ne’ebé Governu atu foti. Ita presiza halo revizaun, halo ajustamentu ba desizaun sira iha Oitavu Governu foti, liuliu kriasaun I.P ho E.P ne’e. I.P ho E.P ne’e di’ak más ninia implementasaun ita haree katak fó despeza boot ba Estadu duké nia hatama reseita. Ninia dependénsia boot liu ba orsamentu Estadu”, deputadu ne’e dehan.
Notísia relevante: Deputadu sira konkorda halo avaliasaun ba ezisténsia I.P no E.P sira
Jornalista: Nelson de Sousa
Editora: Maria Auxiliadora
