VIKEKE, 17 Juñu 2025 (TATOLI)-Xefe sentru saúde postu Vikeke Vila, munisípiu Vikeke, João Corte-Real, informa hahú husi Janeiru to’o Maiu ninia parte rejista kazu númeru aas mak Insfesaun Respiratória Aguda (ISPA) hamutuk rihun 1.034.
“Kazu sira seluk ne’e númeru kiik liu kompara ho ISPA”, João Corte Real ba jornalista sira iha Sentru Saúde Vikeke Vila, ohin.
João subliña kazu ISPA ne’ebé agora kontinua domina, kauza husi rai-rahun no konsumu bee matak. Tanba ne’e, bainhira la’o uza máskara no hemu bee.
“Atu evita moras ISPA ita tenke atensaun. Bainhira la’o iha estrada mak rai-rahun barak, di’ak liu uza máskara, hamoos uma laran no konsumu bee tenke nono, antes han tenke fase liman, nune’e prevene moras ISPA”, nia hato’o.
Nune’e nia dehan, komunidade ne’ebé hetan moras ISPA tenke ba fasilidade saúde sira hanesan postu saúde ne’ebé besik komunidade hodi halo tratamentu no simu ai-moruk husi pesoal saúde sira.
“To’o agora ita-nia stouk ai-moruk báziku iha sentru saúde no postu saúde hamutuk item 22 agora daudaun ne’e, ita-nia ai-moruk sei sufisiénte hodi fó atendementu ba atendementu pasiénte sira-ne’ebé halo tratamentu iha fasilidade saúde”, nia hato’o.
Nia relata, husi Janieru to’o Maiu komunidade sira-ne’ebé vizita fasilidade saúde postu saúde, sentru saúde no internamentu hamutuk rihun 45.261.
Tuir dadús kazu moras sira-ne’ebé rejista iha sentru saúde Vikeke Vila husi fulan Janieru to’o fulan Maiu 2025 kompostu husi kazu ISPA 1.034, akuta di’aria 101, Pneumónia 27, diárea ho raan 49, Skabies 8.
Notísia relevante: Janeiru-Fevereiru: Sentru saúde Vikeke vila rejista moras IRA 4.263
Jornalista : Vitorino Lopes da Costa
Editora : Rita Almeida
