SSK Kailaku rejista asu tata ema 18 durante Outubru 2024-17 Juñu 2025
KAILAKU, 17 juñu 2025 (TATOLI)—Sentru Saúde Komunitária (SSK) postu Administrativu Kailaku, munisípiu Bobonaru rejista asu tata ema hamutuk na’in-18 durante outubru 2024 to’o 17 Juñu 2025, ne’ebé pasiente sira ho idade labarik no adultu.
Xefe Sentru Saúde Kailaku, Marçal Barros Soares, konfirma, pasiente sira ne’e daudaun ne’e simu hotu ona vasinasaun no balun vasina ona ba etapa daruak no datoluk ona.
“Ami iha dadus pur volta de ema na’in-18 mak ami rejista ho kazu asu tata sira ne’e ekipa veterinaria mak relata mai ami hodi ami lori pasiente ne’e mai vasina iha sentru Saúde. Sira-nia kondisaun agora rekupera maibé ita la hatene buat vírus ne’e maibé ami nafatin halo promosaun ba sira kona-ba transmisaun vírus ne’e, husu para komunidade hotu bele atensaun ba moras sira ne’e,” Xefe Sentru Saúde Kailaku informa ba Jornalista sira, iha edifisíu administrasaun postu Kailaku, Tersa ne’e
Notísia Relevante : Pasiente pozitivu raiva daudaun ne’e kondisaun krítika
Xefe suku Meligo, Duarte Soares, hateten, to’o agora suku Meligo seidauk rejista kazu asu tata ema.
Líder komunitária ne’e afirma komunidade nia asu balun mak simu ona asina maibé barak mós seidauk simu.
“Sira seidauk hetan vasina ne’e tanba sira-nia programa sei liu de’it husi estrada ninin, ne’ebé seidauk bele perkore ba aldeia-aldeia tanba programa ne’e dalaruma mai limitadu no aimoruk seidauk to’o. Maibé realidade iha munisípiu Bobonaru hatudu katak asu tata ema mate, tanba ne’e ami husi líder komunitária husu atu kontinua aktividade vasinasaun tama to’o aldeia,” nia akresenta.
Notísia Relevante : Joven ida iha Maliana hakotu iis tanba infetadu virus raiva
Duarte preukupa tanba asu iha fatin balun simu ona vasina anti-rabíotika maibé nafatin rata ema.
“Mais ou menus ai-moruk ida vasina Asu ne’e mak la forte ka oinsá, ida-ne’e ami preukupa tanba ha’u haree iha fatin seluk asu ida bele tata ema na’in-hitu ou rua no hamate em,” nia katak.
Tuir dadus hahú husi Janeiru to’o Marsu 2025 husi Departamentu Veterinaria, relata asu posiztivu ba vírus raiva hamutuk 20, numeru ne’e relata husi postu administrativu neen iha munisípiu Bobonaru ne’e maibé barak liu iha Maliana no Kailaku ne’ebé konsidera área risku.
Alende ne’e, dadus husi parte Vijilánsia Epidiomolojía Servisu Saúde Munisipál Bobonaru hahú husi Janeiru to’o ohin (16/06) rejista ema na’in-90 mak asu tata no simu hotu ona vasinasaun.
Jornalista : Sergio da Cruz
Editora : Julia Chatarina
