DILI, 16 Juñu 2025 (TATOLI)—Tribunál Judisiál Primeira Instánsia Dili (TJPID), segunda ne’e, kontinua halo debate instrusaun ba kazu atividade ilísitu ba droga ne’ebé envolve husi arguidu na’in-13 iha tinan 2022.
Iha sala julgamentu Tribunál, liuhusi Juíz José Quintão, deside katak kazu atividade ilísitu ba droga ne’ebé envolve husi arguidu referidu prosede ba julgamentu.
Nia dehan razaun kazu ida-ne’e avansa ba julgamentu tanba hafoin Tribunál verifika tiha faktu no prova sira-ne’ebé Ministériu Públiku aprezenta iha akuzasaun, Tribunál haree katak arguidu na’in-13 iha indísiu sufisiente envolve iha kazu droga. Tanba ne’e, Tribunál pronúnsia katak kazu ida-ne’e tenke avansa ba julgamentu.
“Hanesan ita-boot sira hatene katak debate instrusaun ida-ne’e ninia objetivu mak atu verifika faktu no prova sira-ne’ebé Ministériu Públiku konsta iha akuzasaun atu haree ida-ne’ebé mak prenxe hodi Tribunál bele avansa ba julgamentu. Tanba ne’e, Tribunál pronúnsia katak faktu no prova sira-ne’ebé konsta iha akuzasaun Ministériu Públiku nian ne’e maioria válidu hotu no iha balun mak nulu. Tribunál Pronúnsia katak ba arguidu na’in-13 ne’ebé konsta iha akuzasaun ne’e iha indísiu sufisiente komete iha krime droga, nune’e Tribunál deklara kazu ida-ne’e kontinua ba julgamentu,” Juíz José Quintão deklara iha sala julgamentu TJPID, Kaikoli.
Notísia relevante: Tribunál hahú halo debate instrusaun ba kazu droga ne’ebé envolve husi arguidu na’in-13
Juíz Quintão fundamenta iha nia desizaun hodi afirma katak só iha faktu balun mak Tribunál konsidera la provada ka nulu mak momentu Servisu Nasionál Intelejénsia bá halo apreensaun no buska domisiliária ba arguidu Muhamad Alkatiri nia rezidénsia no Elvio nia rezidénsia iha área Fomentu.
Nia esplika, Tribunál konsidera katak momentu ekipa SNI ba halo apreensaun no buska domisiliáriu iha arguidu na’in-rua nia rezidénsia ne’e lahó mandadu judisiáriu.
Nia hateten, kuandu atu halo apreensaun no buska domisiliária ba ema-nia rezidénsia autormatikamente tenke bazeia ba mandadu judisiáriu, maibé momentu ne’e, ekipa Servisu Nasionál Intelejénsia bá halo apreensaun no buska iha arguidu na’in-rua nia rezidénsia lahó mandadu.
José haktuir, hafoin Tribunál verifika tiha faktu no prova sira-ne’e, Tribunál konsidera nulu no hafoin Tribunál haree tiha faktu sira no prova sira liuliu objetu krime sira-ne’ebé momentu ne’e SNI foti iha arguidu na’in-rua nia rezidénsia iha altura Tribunál halo Primeiru Interrogatóriu liuhusi Juíz turnu ne’ebe prezide kazu ne’e, la haree didi’ak hodi omóloga tiha objetu apreendidu ne’ebé mak foti iha arguidu na’in-rua nia rezidénsia. Tanba ne’e, liuhusi desizaun ba debate instrusaun ida-ne’e, Tribunál deside prosesu apreensaun no buska iha arguidu na’in-rua nia rezidénsia ne’e nulu.
“Tanba ne’e, Tribunál liuhusi desizaun ba debate instrusaun ida-ne’e, husu ba Ministériu Públiku labele utiliza faktu ida-ne’e ba iha produsaun prova bainhira aban-bainrua kazu ne’e avansa ba iha julgamentu. Tanba, Tribunál konsidera katak faktu no prova ne’ebé Ministériu Públiku konsta iha akuzasaun ne’e nulu, inklui objetu krime sira-ne’ebé mak autoridade sira foti iha arguidu Muhamad Alkatiri no Elvio nia rezidénsia ne’e nulu,” José afirma.
José tenik, faktu no prova ida de’it mak Tribunál konsidera nulu. Enkuantu, faktu no prova sira seluk ne’ebé Ministériu Públiku halibur iha akuzasaun ne’e iha indísiu ba krime droga.
“Faktu no prova sira-ne’ebé ohin Tribunál lee ne’e la signifika ita-boot sira sala no hetan ona kondenasaun. Maibé, faktu no prova sira-ne’e hatudu katak kazu ida-ne’e avansa ba julgamentu. Ha’u hanoin ida-ne’e desizaun husi Tribunál ba debate instrusaun ba kazu ida. Karik la konkorda ba desizaun ne’e bele rekursu,” nia esklarese.
Iha sala julgamentu bainhira Tribunál liuhusi Juíz José Quintão fó-sai tiha desizaun ba debate instrusaun ba kazu droga ne’e, parte defeza husi arguidu sira laiha kontestasaun ba desizaun referida.
Jornalista: Natalino Costa
Editór: Xisto Freitas da Piedade
