DILI, 18 Juñu 2025 (TATOLI)-Diretór Nasionál Rekursu Umanu iha Ministériu Edukasaun (ME), João Amaral, hatete, eis profesór kontratadu 2023 na’in-313 inklui portavós eis profesór kontratadu 2023, Agostinho Pinto, pasa iha teste espesiál.
“Valór 60 ba leten iha 153, sira ida-ne’ebé mak aumenta ho pursentu 10, valór 50 ba leten ne’e iha ema 160 ne’e mak hamutuk 313”, nia dehan ba TATOLI iha VilaVerde, ohin.
Responsável ne’e hatutan teste espesiál hanesan ho teste bolsa kandidatu antes ne’e, ne’ebé hein informasaun husi ministériu edukasaun.
“Ita sei koloka teste espesiál hanesan mós ho teste baibain tuir lugár ne’ebé mak iha no kona-ba kolokasaun bainhira ne’e ami seidauk bele fó komentariu tanba teste foin ramata”, nia esplika.
Nia informa númeru provizóriu ba kandidatu ne’ebé pasa ne’e hamutuk 1.101, sei falta ema 300-resin hodi kompleta ba alvu lugár 1.450. Tanba bolsa kandidatu baibain ne’e iha 788 mak pasa no teste espesiál iha 313.
“Provizoriamente ne’e agora ita iha 1.101, kerdizer sei presiza tan ema 300 resin”, katak nia.
Nia dehan lugár ba multimedia ema 100-resin maibé lugár ne’ebé menus mak melaiu, matemátika, portugés.
“Horiseik loron ikus teste espesiál ba ita-nia eis profesór kontratadu sira, no iha ne’ebá ita-nia portavós Agostinho Pinto mós tuir teste no hetan valór 68 iha dixiplina jeolojia no biolojia, ne’ebé hetan bonus hosi komisaun funsaun públika no ministériu edukasaun pursentu 10 mak hamutuk 78”, nia dehan.
Nia hatutan ohin ba oin ekipa sei halo prosesu ba dokumentu sira, presiza haree mós lugár ida-ne’ebé mak ema pasa barak liu. Kandidatu ne’ebé pasa hein de’it informasaun hosi Ministériu Edukasaun.
“Horisehik ne’e teste hotu ona no agora ami halo prosesu relatóriu hodi submete ba Ministra Edukasaun, Dulce de Jesus Soares, hafoin anúnsia ba públiku”, nia afirma.
Totál eis profesór kontratadu sira 2023 nian ne’ebé mai aplika ba teste hamutuk 725. Husi númeru ne’e 701 mak partisipa iha teste espesiál nune’e ema na’in 309 mak pasa.
Totál kandidatu hamutuk 10.679 mak sei tuir teste iha loron 19 no no sei remata iha 17 Juñu 2025.
“Totál aplikante aprovadu ka liu selesaun dokumentu hamutuk 10.679, feto 5.748, no mane 493. Hosi númeru ne’e kompostu husi aplikante rekrutamentu públiku ne’ebé aprovadu ka passa selesaun dokumentu hamutuk 9.953, feto; 5.379 no mane iha 4.574. Aplikante eis-kontratadu tinan 2023 ne’ebé pasa selesaun dokumentu hamutuk 731, feto iha 371, no mane iha 360,” Diretór Rekursu Umanu relata.
Notísia relevante: Eis-profesór kontratadu 2023 teste ona ba vaga espesiál
Jornalista : Osória Marques
Editora : Rita Almeida
