DILI, 16 Juñu 2025 (TATOLI)-Prezidente Konsellu Juri ba Teste Sekundáriu, João Amaral, informa eis-profesór kontratadu 2023 sira, ohin halo ona teste espesiál.
“Ohin loron dahuluk sira (eis manorin) kontratadu 2023 nian hahú teste ba vaga espesiál”, atuál Diretór Rekursu Umanu iha Ministéiru Edukasaun (ME) dehan iha Komisaun Funsaun Públika (KFP), Matadouru, segunda ne’e.
Notísia relevante: KFP esklarese estatutu profesór kontratadu 2023
Responsável ne’e hatutan dadeer hahú ho ema 180, depois kontinua kedas iha lorokraik. Totál ema ne’ebé teste hamutuk 725.
“Aban ne’e ba kandidatu sira-ne’ebé mak la konsege tuir ezame iha loron hirak liubá, iha difikuldade hodi la tuir teste no iha balun ne’ebé mak halo reklamasaun sira mak ita adia filafali ba aban ne’e. Sira uituan de’it parese ema 40-80 hanesan ne’e”, nia dehan.
Nia realsa katak ba bolsa kandidatu vaga sekundáriu ne’ebé hahú ona tuir teste iha loron 19 Maiu ne’ebé pasa hamutuk 714.
“Ita presiza lugár hamutuk 1.450. Ne’ebé ita sei fahe ba kada grupu. Entaun sira-ne’ebé pasa ne’e hosi valór 60 to’o 82”, nia dehan.
Notísia relevante: ME enkoraja profesór kontratu tuir teste espesiál
Jornalista : Osória Marques
Editora : Rita Almeida
