DILI, 16 Juñu 2025 (TATOLI)-Komisáriu Funsaun Públiku (KFP), José Telo, hatete profesór kontratadu 2023 bele konkore ba bolsa kandidatu tuir polítika foun ministériu edukasaun nian.
“Agora ministériu mai ona ho polítika bolsa kandidatu, sé mak hakarak bolsa kandidatu, no sira ne’ebe iha kontratu ajente administrasaun ho nia avaliasaun dezempeñu 2020, 2021, 2022 iha 2023 ne’e ingresu hotu ona”, José Telo hatán hodi klarifika preokupasaun profesór kontratadu 2023.
Nia hatutan tan: “Ha’u hakarak hatete de’it, servisu kontratadu ajente nia natureza ne’e kontratu fulan neen no bele estende fulan neen, karik fulan neen ne’e ministériu propoin ami kontinua, se la propoin entaun labele”.
José Telo esplika ajente administrasaun públika nia kontratu ne’e eventuál, kada fulan neen no depende ba ministériu. Tanba ne’e, dalan hodi solusiona mak tuir teste bolsa kandidatura.
“Avaliasaun bele halo para salva guarda, lei mós hatete. Uluk komisaun hasai tan deliberasaun, ema ne’ebé iha direitu ba ingresu ne’e tenke iha avaliasaun dezempeñu 2021 no 2022, sira 2023 atu sai hanesan referénsia atu aplika ba servisu seluk, tanba ida-ne’e mak tau teste espesiál ba sira”, nia haktuir.
Portavós eis manorin kontradu tinan-2023, Agostinho Pinto, husu KFP esklarese manorin sira-nia estatutu ajente ne’e legál ka ilegál tanba manorin sira-nia naran iha ona sistema funsaun públika.
“Kona-ba estatutu ajente funsaun públika nia, ami la’os kontratu kazuais maibé kontratu ajente administrasaun funsaun públika ne’ebé rekruta liuhusi dekretu lei nu 22/2011 8 de juñu. Ohin ami atu tuir teste ne’e tenke komfirma ho komisaun funsaun públika. Loos duni ka lae ami-nia estatutu ajente ne’e ilegál ka legál, tanba ami iha ona númeru NIS”, portavós ne’e dehan ba jornalista sira iha KFP Matadouru, segunda ne’e.
Nia dehan tuir dekretu lei estatutu kareira dosente Ministériu Edukasaun nian, ajente ne’ebé mak iha tinan 2023 la presiza tuir teste, tanba iha ona ingresu espesiál presiza de’it mak atu halo avaliasaun dezempeñu, tanba lei funsionáriu públiku iha rua de’it, funsionáriu permanente no ajente.
“Ami husu Prezidente KFP atu esklarese, ami-nia estatutu ne’e, ajente ne’e ilegál ka legál, tanba se laiha karta formál ruma, ba futuru governu ne’ebé mak mai bele hatun no hasae. Tanba ne’e , ami nafatin husu KFP ninia responsbilidade ba ami. Ba oin sira nafatin husu KFP nia responsabilidade katak sira ne’e ajente legál ka ilegál, tanba sistema ne’e inativu ona”, nia dehan.
Portavos ne’e haktuir momentu ne’ebé Ministériu Edukasaun ho sira halo akordu, sira tenke submete ba teste espesiál liu-liu ba sira ne’ebé ho diploma lisensiatura.
“Ami submete dokumentu, ema na’in 38 mak KPF no ME halakon tiha fali, maibé tuir loloos ami la merese ona atu halo selesaun dokumentu, ami nia naran públika iha jornal da republika nu’udar ajente administrasaun funsaun publika”, nia dehan.
“Se teste espesiál tanba sa mak sei halo tan selesaun dokumentu, sira ne’ebé ho lisensiatura na’in 38 lakon tan fali, ida-ne’e ami sente katak la justu nafatin iha diskriminasaun, tanba ne’e ha’u husu ekipa de juri atu suspende lai teste ida ne’e, tanba ha’u iha ona akordu ho portavos ME”, nia hatete.
Nia akresenta sira la’ós hakarak tuir teste, maibé hanesan solusaun ida no sira hakarak oferese ba ME atu kolobora ho sira tuir polítika ne’ebe iha, maibé parte ME halo lakon fali tan maluk sira ne’ebé lisensiatura.
“Nune’e selesaun dokumentu ne’e ba ema ne’ebé foin mak atu tuir teste, ami iha ona sistema funsaun públika nia laran, tanba ne’e ami ezije KFP atu responsabiliza, lei Funsaun Públika ne’e vale ka-lae. Tanba bainhira atu hapara funsionariu ka ajente ida tenke simu despasu husi KFP, hapara ema ne’e razaun saida”, nia dehan.
Notísia relevante: ME reafirma desizaun ikus solusiona problema eis-profesór kontratadu 2023
Jornalista : Osória Marques
Editora : Rita Almeida
