DILI, 06 Fevereiru 2025 (TATOLI)-Portavós Ministériu Edukasaun (ME), liuhusi konferénsia imprensa reafirma desizaun ikus solusiona problema eis-profesór kontratu 2023 ne’ebé la’o durante tinan ida resin.
“ME sei servisu hamutuk ho KFP oferese teste espesiál ba profesór kontratadu 2023 ne’ebé prenxe kritériu atu sai profesór iha futuru”, dehan Filipe Rodrigues Pereira ba jornalista sira iha salaun ministériu, kinta ne’e.
Manorin kontratu 2023 ne’ebé la-prenxe kritériu tuir teste espesiál, tanba ho de’it diploma sekundáriu, ME sei tetu no solusiona tuir regra estatutu professor-nian.
Estatutu karreira ensinu-nian haktuir ona iha dDekretu-lei 31/2023, 31 Maiu alterasaun dahuluk dekretu lei númeru 23/2010, 9 desembru.
Nia dehan, problema ne’e sei solusiona ho fazeadamente, maibé sei hala’o uluk teste espesiál no ikus sei fó solusaun ba profesór kontratadu 2023 ne’ebé mak ho de’it diploma sekundária.
ME mós hakarak esklarese liga ho teste espesiál ba profesór kontratadu 2023 sei hala’o ho pasu sira hanesan teste dahuluk, hafoin loke teste jerál ba bolsa kandidatus profesór. Nia dehan teste espesiál hahú tinan ne’e.
“Ministériu Edukasaun sei fasilita matrix (kisi-kisi) ba profesór kontratadu 2023 atu estuda, prepara aan antes tuir teste. Matrix nu’udar matéria jerál ba teste espesiál nian. Espera ho preparasaun ne’ebé di’ak, profesór kontratadu 2023 sira sei hetan mós rezultadu di’ak iha teste”, nia dehan.
Nia dehan tan teste espesiál sei hahú halo ba Ensinu Sekundáriu Jerál (ESJ) no Ensinu Sekundáriu Tékniku Vokasionál.
“Teste bolsa kandidatu profesór iha tinan kotuk ne’ebé halo dala rua ona, iha profesór kontratadu 2023 porvolta 200-resin mak passa iha teste sira referida. ME hakarak enkoraja profesór kontratadu 2023 ne’ebé seidauk hola parte iha teste sira iha tinan 2023 atu uza oportunidade di’ak iha teste espesiál, nune’e ita hotu-hotu bele kontribui ba edukasaun ida ho kualidade ba ita-nia oan ka jerasaun sira iha future”, nia dehan.
Iha fatin hanesan Koordenador Eis-Profesór kontratadu 2023, Celestino Júlio Belo, dehan grupu profesór kontratadu 2023 hotu konkorda maibé tenke iha akordu ida entre sira ho ME.
Nia dehan, konkorda ho teste espesiál ne’e maibé tenke ho akordu, tanba dekretu estatutu karreira ensinu-nian.
Nia argumenta: “Diploma sekundáriu sira ne’e mós iha lei baze edukasaun la-autoriza atu tuir teste, tanba ne’e mak ema nia dedikasaun durante ne’e mak ami defende, la’os ami hakarak atu kontra lei baze edukasaun ne’e. Tanba ne’e mak ami kontinua rejeita teste ne’e tanba ami mós kontratadu hanesan ho kolega sira seluk ne’ebé mak ingresu ona, soke tempu kontratu ne’e mak diferente, maibé estatutu ne’e hanesan de’it, hotu-hotu ajente administrasaun públika”, nia hatutan.
Celestino afirma, ministériu obriga atu tuir teste ne’e tenke ho akordu, tanba profesór balun dedika aan ho voluntáriu to’o simu kontratu.
“Karik ami hotu-hotu partisipa iha teste ne’e kuandu la-liu ne’e oinsá, tanba loloos ne’e ami la presiza tan atu partisipa iha teste, como ami hakarak atu koopera atu konklui problema ne’e mak ami prontu partisipa, maibé karik sira ne’ebé la-liu ne’e oinsá”, nia dehan tan.
Tuir nia, dekretu lei ne’e la obriga profesór kontratadu partisipa teste, troka teste ne’e mak ingresu espesiál iha artigu 11 no kontratu indeterminadu iha artigu 12, ba profesór sira ne’ebé mak finaliza akadémika mínimu la-prenxe hanesan baxarelatu laiha ka hanesan sekundária sira de’it, tanba ne’e mak husu sira nia esplikasaun klaru ba ida ne’e.
Totál profesór kontratadu 2023 hamutuk 1,499 no na’in 200-resin mak tuir no pasa ona vaga bolsa kandidatu.
Notísia relevante: Antigu profesór kontratadu 251 mak tama ona ba bolsa kandidatu
Jornalista : Osória Marques
Editor : Rita Almeida
