DILI, 17 Fevereiru 2025 (TATOLI)-Ministra Edukasaun, Dulce de Jesus, enkoraja profesór kontratu 2023 tuir teste espesiál tuir sistema ne’ebé ministériu hatur ona.
Ministra Dulce hatete, teste espesiál hanesan desizaun ministériu-nian hodi solusiona kestaun profesór kontratadu 2023.
“Desizaun mak teste espesiál, ita sei fó uluk teste espesiál ba ita-nia maluk antigu kontratadu 2023 ne’e, se sira lakohi partisipa ne’e sira-nia direitu, importante Governu hatudu nia responbilidade katak fó oportunidade ba sira, ema atu tuir ka lakohi tuir ita labele obriga, ita enkoraja ema hotu-hotu atu tuir sistema ne’ebé Ministériu Edukasaun hatur ona mak atu sai profesór iha Nasaun ida-ne’ebé ho dalan ida katak tenke tuir teste”, dehan Ministra iha salaun INFORDEPE, Balide, segunda ne’e.
Kona-ba konkordansia entre ministériu ho antigu profesór kontratadu bainhira la-liu teste, ministra dehan, teste ne’e atu haree ba ema ne’ebé passa la’ós haree ba ema ne’ebé la passa.
“Teste ne’e hanesan jogu ida, balun lakon no balun manán, ne’ebé ita enkoraja kolega sira hodi hola parte iha teste espesiál, se ita la iha teste espesiál ne’e ita sei bele tuir teste jerál ne’ebé ita sei loke ba ema hotu ne’e”, dehan ministra.
Nia hatutan, teste espesiál no teste jerál ne’e sei loke iha tempu badak.
“Ami iha faze preparasaun ba rekrutamentu, tanba rekrutamentu ne’e mós prosesu ida ne’ebé la’ós fasil, primeiru tenke halo kuadru pesoál. Iha tinan liuba ita konsentra ba kuadru pesoal, ba ensinu báziku no pre-eskolár, no tinan ida-ne’e ita mós sei haree ba ensinu sekundáriu jerál no ensinu tékniku vokasionál, espera ita sei rekruta iha trimestre dahuluk ida-ne’e, nune’e mós kona-ba teste espesiál ne’e rasik, maibé ita sei fó uluk teste espesiál hafoin ba iha teste jerál”, nia informa.
Notísia relevante: Antigu profesór kontratadu konkorda partisipa teste espesiál, parte balun sei diskute
Jornalista : Osória Marques
Editora : Rita Almeida
