DILI, 18 Juñu 2025 (TATOLI)-Embaixadór Timor-Leste ba Reinu Kamboja, Marcos da Costa, hasoru malu ho Primeiru-Ministru (PM), Xanana Gusmão, hodi simu orientasaun molok aranka bá Kamboja hodi hala’o misaun nu’udar reprezentante Estadu Timor-Leste nian.
Marcos da Costa hateten objetivu husi sorumutu ne’e, tanba Primeiru-Ministru hanesan Xefe Governu ida, entaun husu nia orientasaun diretiva polítika saida mak hanesan Embaixadór Timor-Leste nian ba Kamboja bele hala’o misaun.
“Primeiru-ministru hato’o parabéns no dezeja serbisu di’ak iha ne’ebá. Husu kontinua mantein relasaun bilaterá entre Timor-Leste no Kamboja no fortalese kooperasaun ne’ebé nasaun ne’e iha, liuliu ita-nia andamentu molok atu to’o Outubru sai membru ASEAN nian”, Marcos da Costa hateten iha Palásiu Governu, ohin.
Nia subliña katak nu’udar reprezentante Estadu Timor-Leste nian iha Kamboja, nia parte sei kontinua kooperasaun ne’ebé nasaun rua ne’e hala’o ona. Relasaun bilaterál ne’ebé iha di’ak tebes, tanba Prezidente Repúblika mós halo ona vizita bá ne’ebá, nomós sira-nia Prezidente Senadu Hun Sen foin lalais mai no iha nivel polítika di’ak tebes.
“Kooperasaun ekonómika ita mós iha komérsiu ba foos nian, nomós haree ba agrikultura nian. Foin lalais mós iha akordu iha área edukasaun, entaun esforsu ne’ebé ha’u sei halo durante iha ne’ebá atu implementa akordu sira ne’ebé durante ita iha ona no buka espande tan área kooperasaun saida mak ita bele halo ho Kamboja atu haree mós ponténsia investidór sira husi Kamboja mai Timor-Leste, nomós estabelese relasaun komérsiu entre ita-nia setór privadu sira”, nia dehan.
Hodi relata katak misaun iha Kamboja sei hahú iha 01 Jullu, nune’e nia sei aranka bá Kamboja iha semana dahuluk iha Jullu tinan ne’e.
Lembra katak, iha loron 09 Juñu 2025, Marcos da Costa simu pose husi Prezidente Repúblika, José Ramos Horta, nu’udar Embaixadór Estraordináriu no Plenipotensiáriu Repúblika Demokrátika Timor-Leste ba Reinu Kamboja, iha Palásiu Prezidente Nicolau Lobato.
Nomeasaun ne’e reprezenta marku istóriku ida iha relasaun diplomátika entre Timor-Leste no Kamboja hafoin vizita ofisiál foin lalais ne’e husi Prezidente Senadu no Eis-Primeiru-Ministru Kamboja nian, Hun Sen, mai Timor-Leste, estabelesimentu Embaixada Kamboja nian iha Dili no aprezentasaun kredensiál hosi Embaixadór Chun Sovannarith, subliña krximentu parseria entre nasaun rua.
Nomeasaun Embaixadór Marcos da Costa reprezenta progresu signifikativu ida iha relasaun diplomátika entre nasaun rua no reflete kompromisu hamutuk ba kooperasaun rejionál no dezenvolvimentu iha kuadru ASEAN nian.
Notisía relevante: PR Horta fó pose ba embaixadór Timor-Leste ba Reinu Kamboja
Jornalista : Arminda Fonseca
Editora : Maria Auxiliadora
