Família klarifika Hermenegildo Pereira tara-aan iha rezidénsia bairru Oébau
OEKUSI, 18 Juñu (TATOLI) – Família klarifika kona-ba motivu matebian Hermenegildo Pereira ho naran bolu Amuti, idade 29, hakotu vida liuhusi tara-aan iha nia rezidénsia bairru Oébau, suku Costa, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
José Luís Pereira, nu’udar aman husi matebian fó sasin katak, motivu husi kazu ne’e tanba problema feto, ne’ebé akontese iha loron 13 Juñu 2025, kalan, bainhira partisipa festa iha bairru Oébau.
“Ha’u husu nia (matebian) dehan prontu atu responsabiliza, to’o fali meiudia família husi labarik ne’e mai iha uma, ami ko’alia dehan atu rezolve no ami mós konkorda. Maibé iha kalan ne’e, família matebian ne’e hakat sa’e ba família feto nia uma, família lakohi atu ko’alia ona tuir kultura nian, tanba família hato’o ona keixa iha Uma-Mahon no PNTL,” nia informa ba jornalista sira, iha Bairru Oébau, ohin.
Nune’e, nia dehan: “Ami família rua ne’e, halo ona karta akordu ofisiál ida ona, maibé labarik ne’e hanoin barak, tanba kazu ne’e tama to’o Uma-Mahon ona, horisehik ami ba PNTL, maibé haruka ami fila, hodi hein fali labarik feto ne’e sai atu ko’alia, maibé kalan matebian hanoin barak atu tama komarka entaun komesa horisehik (loron-tersa) nia tuur la metin,” nia informa.
Notísia relevante:PNTL OÉ-CUSSE Rejista Kazu Krime 60
Ho sentimentu triste ne’e, nu’udar apoia motivasaun atu labele hanoin barak no tauk tanba família hanesan aman sei moris hela atu apoia kona-ba kazu referidu atu rezolve tuir tradisaun Atoni-nian.
“Horikalan ha’u bolu ko’alia tan ho nia, depois ha’u ba ona servisu, ohin (kuarta-feira) dadersan ha’u fila mai la hetan nia, ha’u komesa husu no buka nia ona, ba tasi-ibun no kampu futeból nia sorin maibé la hetan, nune’e ha’u mai fali to’o de’it estrada, alin ki’ik ida bolu ha’u dehan, apa Amuti tara-an iha nia kuartu, nune’e ami ba haree iis laiha ona, ami mós lahatene nia tara-aan iha sá oras, tanba dadersan ne’e mak ami buka foin hetan ho kondisaun mate ona,” nia relata.
Entretantu, matebian moris iha 1996 nu’udar oan daruak, daudaun moris hamutuk ho nia aman de’it tanba inan matebian ona hodi afeta mós nia eduksaun hodi asesu to’o de’it eskola primária no daudaun ne’e seidauk forma família.
Iha fatin hanesan, Komandante PNTL Oekusi, Superintendente Polísia, Angelo Quelo, hateten, nia parte seidauk bele relata detalladu kona-ba kazu referidu tanba sei hein relatóriu husi sesaun investigasaun.
“Ha’u sei hein relatóriu husi sesaun investigasaun, maibé kazu akontese motivu mai husi problema feto, horsehik nia (matebian) ba presta deklarasaun iha komando duni, ne’ebé informasaun detalla sei fó-sai depois, tanba relatóriu seidauk to’o mai,” nia informa.
Tuir observasaun Jornalista Ajénsia Tatoli,I.P, katak hafoin akontese parte komandu PNTL liuhusi sesaun investigasaun servisu hamutuk ho médiku sira husi Ospitál Referál Oekusi halo kedas identifikasaun no ezaminasaun.
Hafoin ne’e, transporta kedas isin-mate ne’e, hodi asegura iha mortuário atu halo autopsia maibé parte família rejeita, no daudaun ne’e, matebian iha ona família hodi prepara halo seremónia funeral, ne’ebé tuir planu sei hakoi iha loron kinta-feira 19 Juñu 2025 ne’e, iha bairru Horta suku Costa sub-rejiaun Pante Makasar.
Notísia relevante:2024, PNTL Oé-Cusse rejista kazu 596 no na’in-11 tama prizaun
Jornalista: Abílio Elo Nini
Editór: Florencio Miranda Ximenes
