DILI, 18 Juñu 2025 (TATOLI)—Diretór Servisu Apoiu Diagnóstiku no Terapéutiku Hospital Nacional Guido Valadares (HNGV), Vidal de Jesus Lopes, hateten konstrusaun sala pediatria andár lima no Unidade Kardiolojia Kuidadu Intensivu (ICCU-sigla ingleza) iha HNGV daudaun ne’e atinje ona 46%, nune’e dezembru empreza sei entrega ba HNGV, tanba andár tolu atu ramata ona.
“Progresu ba sala pediatria iha HNGV daudaun ne’e atinje ona 46%. Espera katak iha tinan ida-ne’e nia rohan bele finalizadu, tanba daudaun ne’e andár tolu kuaze atu ramata ona,” nia dehan ba TATOLI, iha nia kna’ar fatin, Bidau, kuarta ne’e.
Responsavel ne’e haktuir, tuir verbalmente husi empreza katak sira sei konklui konstrusaun ne’e iha fulan dezembru.
“Empreza sira servisu di’ak hela, tanba loron mós sira servisu másimu, kalan mós sira kontinua servisu,” Vidal informa.
Notísia relevante: Governu husu Empreza CCECC aselera konstrusaun sala pediatria no ICCU
Nia relata, kama ne’ebé mak sei tau iha sala pediatria andár lima no ICCU ne’e hamutuk 300-resin inklui ho ekipamentu báziku sira to’o sufistifikadu.
“Bainhira edifisiu ne’e prontu ona bele responde ba problema overload ne’ebé mak ita hasoru, tanba rekursu umanu mós agora iha prosesu estudu hela. Tan ne’e, banhira edifisiu ne’e prontu bele mai apoiu tan no sei uza mós rekursu umanus agora daudaun ne’ebé mak ita iha,” nia tenik.
Antes ne’e, Diretór Empreza China Civil Engineer Construction Cooperation (CCECC), Liang Quing, komprometidu katak sei konklui projetu ida-ne’e ho infraestrutura ne’ebé kualidade ba Governu no povu Timor-Leste.
Orsamentu ba konstrusaun pediatria andár lima iha HNGV ne’e hamutuk $9.341.663,70.
Jornalista: Felicidade Ximenes
Editór: Xisto Freitas da Piedade
