INFPM sei sosa vasina hodi prevene raiva
DILI, 19 juñu 2025 (TATOLI) – Diresaun Aprovizionamentu husi Institutu Nasionál Farmaséutika no Produtu Médika (INFPM), sei sosa tán vasiona bainhira virus raiva ka rabies kontinua aumenta iha territóriu Timor-Leste, tanba virus ne’e hamate ona timoroan balun.
“Kazu aumenta, ida-ne’e tenke sosa, tanba kazu raiva ne’e kazu ne’ebé sai problema ba interministeriál, la’ós de’it iha Ministériu Saúde, maibé mós Ministériu Agrikultura no Peska (MAP), tanba ne’e sira tenke halo tratamentu ba asu no ema, tanba asu mak lori virus ne’e,” Diretór Aprovizionamentu husi INFPM, Sérgio da Costa Belo ba TATOLI iha Kampu Alor Dili, kinta.
Nia dehan, daudaun ne’e Ministériu Agrikultura no Peska halo servisu prevensaun ba virus rabies, nune’e Ministériu Saúde mós halo servisu prevensaun ba virus rabies iha ema no INFPM prontu atu sosa vasina.
“Agora daudaun kazu raiva aumenta, iha Oe-cusse, Bobonaro no agora tama ona iha munisípiu Ermera, daudaun disponivel iha INFPM ne’e doze 720 no Anti-Rabies Serum (SAR) ne’e doze 556,” nia katak.
Nia fó-sai katak, daudaun ne’e vasina rabies temporariamente atu fó atendimentu ba ema ne’ebé asu tata, tanba númeru ema ne’ebe asu tata to’o agora la to’o ema na’in-10 kada loron.
“Tanba ne’e ita sadere metin ho vasina ne’ebé iha ona, importante mak ita-nia komunikasaun entre fatin akontesimentu husi parte hotu-hotu,” nia konklui.
Notísia relevante: Konfirmadu husi HNGV: Pasiente ne’ebé transfere husi Maliana mate tanba pozitivu raiva
Jornalista : Felicidade Ximenes
Editór: Evaristo Soares Martins
