MALÁZIA, 19 Juñu 2025 (TATOLI) – Prezidente Repúblika (PR), José Manuel Ramos Horta, husu Primeiru-Ministru Malázia, Anwar Ibrahim, atu aumenta númeru estudante timoroan iha Malázia tanba setór edukasaun iha Malázia kualidade.
Xefe Estadu fó-sai asuntu ne’e hafoin hasoru malu ho Primeiru-Ministru Malázia, Anwar Ibrahim, iha Malázia, kinta ne’e.
Prezidente Repúblika ko’alia ona Governu Malázia atu simu estudante timoroan sira tanba númeru estudante timoroan iha Malázia oituan liu kompara ho Indonézia.
“Primeiru Ministru Anwar kontente, hakarak duni aumenta estudante timoroan, estudante ne’e bele (iha área) oinoin, balun bele mai lisensiatura, mestradu no doutoramentu, balun ne’e mai diretamente kursu doutoramentu, balun bele mai kursu adaptasaun ka kursu ne’ebé profisionál,” Ramos Horta hateten ba jornalista sira iha Malázia, kinta ne’e.
Eis Ministru Negósiu Estranjeiru no Kooperasaun ne’e informa katak, timoroan sira bele tuir formasaun durante semana ka fulan hodi atualiza (update) sira-nia formasaun ka koñesimentu iha área oinoin.
Maibé Xefe Estadu husu Governu Timor-Leste atu selesiona timoroan sira-ne’ebé matenek atu hala’o estudu iha Malázia.
Iha parte seluk, Xefe Estadu fó-sai katak, iha tempu besik Tailor’s University sei haree kria kritéria no loke programa ne’e ba timoroan sira atu hasai kursu iha lisensiatura no mestradu.
“Universidade mak sei haree hotu hodi fó kritéria nune’e fó bolsa estudu ba timoroan sira. Ha’u ko’alia ona ho Governu atu Malázia bele oferese bolsu estudu barak liu ba timoroan sira, ita haree estudante timoroan iha Malázia uitoan liu,” nia katak.
Prezidente Repúblika konsidera Tailor’s University mós iha ranking mundiál ho totál estudante rihun-22, maibé mantein kualidade, tanba universidade privada ne’e 50% maioria ema estranjeiru.
“Sira konvida ha’u atu sai sira-nia profesór, la signifika ha’u tenke mai beibeik iha-ne’e, maibé ha’u iha tempu bele kombina ho sira atu mai halo palestra ruma ba sira.”
Notisia relevante: Taylor’s University kria programa ‘Horta Scholarship’
Jornalista: Hortencio Sanchez
Editór: Evaristo Soares Martins
