DILI, 19 juñu 2025 (TATOLI) — Vasina Difteria Tétanu Difteria (TD) ne’ebé sosa liuhusi Fundu Nasaun Unida ba Labarik (UNICEF, sigla inglés) hamutuk doze 11.600 entrega ona ba Institutu Nasionál Farmaséutiku no Produtu Médiku (INFPM).
Vasina dT (adultu duplu) proteje hasoru difteria no tétanu, no vasina dTpa (batéria adultu triplu) proteje hasoru difteria, tétanu, no pertussis. dT fó hanesan reforsu kada tinan 10, ka hafoin kanek grave sira, no dTpa rekomenda ba adolexente no adultu sira, ho reforsu kada tinan 10. Feto isin-rua sira tenke simu dTpa hodi proteje hasoru pertussis, aleinde difteria no tétanu.
Diretór Aprovizionamentu husi Institutu Nasionál Farmaséutiku no Produtu Médiku (INFPM), Sergio da Costa Belo hateten, vasina Difteria Tetanus Difteria (TD) ne’ebé sosa liuhosi UNICEF hamutuk doze 11.600 entrega ona ba INFPM.
“Ohin, UNICEF entrega ona vasina TD doze 11.600 ne’ebé embala iha kaixa 10 ba INFPM,” Diretór Aprovizionamentu husi INFPM, Sérgio da Costa Belo ba TATOLI, iha Kampu Alor.
Nia esplika, vasina ne’e sosa liu husi UNICEF ho fundu ho valor rihun $107 no vasina ne’ebé ohin to’o haruka liuhusi aviaun.
“Depois submete ba ekipa Receiving and Inspection (R&I) hodi halo verifikasaun molok submete no rai iha armazein INFPM hodi halo distribuisaun imediata ba sentru saúde sira tuir pedidu ne’ebé iha,” nia katak.
Nia hatutan, vasina ne’e sei fó ba inan isin-rua sira bainhira isin-rua semana 27-36.
Antes ne’e, Xefe Departamentu Imunizasaun husi Ministériu Saúde, Maria Angelina Pereira, rekoñese vasina rubella no sarampu estock laiha hodi vasina ba labarik idade fulan sia iha Dili.
“Vasina ba fali labarik fulan sia no tinan ida fulan neen ne’e mak sarampu ho rubella, ida-ne’e mak estoke mamuk iha Dili, maibé iha munisípiu balun estoke iha hela atu vasina labarik sira,” Maria Angelina Pereira, informa.
Notísia relevante: INFPM haruka osan rihun $107 ba UNICEF sosa vasina rotavirus no DT
Jornalista : Felicidade Ximenes
Editór: Evaristo Soares Martins
