Janeiru-Maiu, SERVE arrekada reseita $298.976,13 ba kofre Estadu

DILI, 20 Juñu 2025 (TATOLI)—Diretór Ezekutivu Servisu  Rejistu no Verifikasaun Emprezariál, Institutu Públiku (SERVE, I.P.), Fausto  Dias, hateten  husi Janeiru mai to’o Maiu tinan ida-ne’e, SERVE arrekada reseita hamutuk $298.976,13 ba kofre Estadu.

“Orsamentu hirak-ne’e maihusi sukursál SERVE sira iha munisípiu inklui Dili, maibé la inklui Rejiaun Administrativa Espesiál Oekusi Ambenu (RAEOA) tanba RAEOA iha konta rasik,” Fausto  Dias dehan ba TATOLI, iha nia kna’ar fatin, sesta ne’e.

Nia dehan, osan sira-ne’ebé mak hatama ba kofre Estadu ne’e maihusi empreza nasionál no mós internasionál sira-ne’ebé mak rejistu sira-nia negósiu iha SERVE.

“Ita hatene katak iha tinan kotuk, Janeiru-Maiu, mekanizmu atendimentu iha SERVE fahe billete de’it, maibé depois  agora ita halakon tiha fahe billete, ita halo atendimentu direta hahú husi segunda to’o sesta nakloke ba ema hotu hodi rejistu sira-nia atividade negósiu,” nia esplika.

Husi tinan 2013 mai to’o Juñu 2025, nia haktuir, ema estranjeiru ne’ebé mai investe iha Timor-Leste  hamutuk 5.286, empreza lokál hamutuk 25.434, empreza ne’ebé mak kahur malu hanesan timoroan ho estranjeiru hamutuk 726 no kooperativa sira ka ONG hamutuk 36.936.

Nia  husu ba empreza sira katak bainhira mai rejistu ona iha SERVE  hodi loke empreza  iha fatin ida, tenke mantein fatin orijinál.

“Bainhira sira mai rejistu dehan iha Dom Aleixo, entaun tenke mantein iha-ne’ebá, maibé bá halo filafali iha munisípiu  seluk, tenke husu sukursál  sira nune’e bele iha lisensa. Bainhira  ita halo tiha atividade iha Bekora  maibé negósiu bá fali fatin seluk, ida-ne’e AIFAESA ho  ministériu relevante  sira  mak sei haree, tanba halo ona falsifikasaun no sei selu multa,” nia konklui.

Jornalista: Felicidade Ximenes

Editór: Xisto Freitas da Piedade