MKI identifika ona fatin foun hodi muda merkadu tradisionál Pássabe
OEKUSI, 20 Juñu (TATOLI) -Ministériu Komérsiu no Indústria (MCI, sigla portugués), daudaun ne’e, identifika ona fatin foun hodi muda merkadu tradisionál Pássabe ne’ebé lokaliza iha suku Abani, ba fali iha área Oékolo iha aldeia Pássabe nian.
Vise-Ministru Komérsiu no Indústria, Agusto Juniór Trindade, hato’o asuntu ne’e, sesta ohin hafoin halo observasaun direta ba kondisaun merkadu ne’e iha RAOEA.
“Ohin mai iha haree merkadu tradisionál Pássabe, merkadu ne’e ho kondisaun ida grave tanba besik liu área públiku hanesan eskola no estasaun Pássabe, entaun tenke muda ba fatin di’ak, ohin mós ha’u observa ona estrada di’ak asesu to’o entaun merkadu ne’e sei muda urjente,” Agusto Juniór Trindade, dehan iha suku Abani.
Notísia relevante:Merkadu tradisionál Pássabe prezudika prosesu aprendizajen EBF Maesmat
Maibe, Governante ne’e dehan, antes atu muda vendedór sira bá iha fatin foun ne’ebé maka identifikadu ona, faze dahuluk tenke kria kondisaun infraestrutura bázika hodi faslita negosiante sira atu halo negósiu ho seguru.
“Ha’u sei ko’alia ho autoridade RAEOA atu bele ita haree hamutuk, la’ós merkadu ida ne’ebé bo’ot no modernu, maibé merkadu ida-ne’ebé tradisionál, simples, maibe sente seguru atu negosiánte lori sira-nia sasán bá merkadu no besikliu komunidade sira,” nia hateten.
Iha fatin hanesan Jestór Sub-Rejiaun Pássabe, Paulino Marques apoiu desizaun Governu liuhosi Ministériu Komérsiu no Indústria hodi muda negosiante sira bá fatin foun tanba durante ne’e rejista prezudika tebes movimentu públiku iha fatin ne’ebá.
“Ami-nia objetivu mak ne’e tenke muda merkadu tradisionál Pássabe bá fatin foun Oékolo tanba fatin klo’ot depois prezudika prosesu aprendijazén iha EBF Pássabe inklui igreja nune’e mós iha loron bazar, komunidade faan de’it iha estrada ne’ebé impede mós movimentu transporte no polítika MCI atu muda, ami apoia,” nia hatutan.
Notísia relevante:Xefe Governu introdús PEDN hodi reajusta ho implementasaun ZEESM ba populasaun iha Pássabe
Jornalista: Abílio Elo Nini
Editór: Florencio Miranda Ximenes
