Merkadu tradisionál Pássabe prezudika prosesu aprendizajen EBF Maesmat
OÉ-CUSSE, 07 marsu 2024 (TATOLI) – Xefe suku Abani, sub-rejiaun Pássabe, Carlos Elo, preokupa ho merkadu tradisonál Pássabe tanba besikliu edifísiu Eskola Bázika Filiál (EBF) Maesmat, nune’e bele prezudika prosesu aprendizajen.
Nia rekomenda ba Autoridade Rejiaun Administrativa Espesiál Oé-Cusse Ambeno (RAEOA) atu muda merkadu tradisonál ne’e ba fatin seluk, nune’e labele prezudika prosesu aprendizajen eskola nian.
“Eskola ida-ne’e problema duni tanba iha merkadu ne’e afeta duni prosesu aprendizajen iha eskola ne’e, ne’ebé ha’u relata mós ba parte kompetente atu nune’e ami servisu hamutuk autoridade lokál, ami prepara duni fatin atubele muda merkadu ne’e, tanba merkadu ne’e la’ós prezudika de’it estudante sira maibé besikliu igreja, ne’ebé kuandu tempu igreja iha loron bazár ne’e implika tebes,” Carlos Elo ba jornalista sira iha sub-rejiaun Pássabe.
Notísia relevante: Autoridade RAEOA aloka rihun $306-resin reabilita merkadu tradisionál Pune
Koordenadora EBF Maesmat, Domingas de Fátima Marques, esplika bainhira tempu bazar, estudante sira labele simu matéria ho di’ak, tanba barullu liu, nune’e husu ba autoridade RAEOA presiza konsidera asuntu ne’e ho sériu.
“Kuandu ho loron sábadu prosesu aprendizajen ami la hala’o tanba alunu sira, empresta livru depois sira hetan literasia hosi profesór atu reforsa sira-nia literasia ba língua portugés no tetun, maibé kuandu loron bainbain ami hala’o prosesu aprendizajen hanesan baibain,” nia hateten.
Maibé kuandu vizita ruma ka loron merkadu prosesu aprendizajen la hala’o tanba merkadu ne’e barullu.
Hatán ba rekomendasaun ne’e, Prezidente Autoridade RAEOA, Rogério Tiago Lobato, promete, sei transforma merkadu tradisionál Pássabe no sei hola desizaun hodi buka fali fatin seluk, nune’e lebele desvia atensaun estudante sira.
“Primeiru ha’u tenke hola desizaun ida kona-bá merkadu ne’e, tanba kuandu merkadu besik ona eskola depois desvia tiha atensaun labarik sira-nian hosi eskola, ita bele transforma fatin ne’e, posivelmente ba eskola ida, ita bele buka fali fatin seluk atu halo fali ba merkadu dook uitona hosi hosi eskola, atu labele interven atensaun labarik sira,” nia katak.
Entretantu, eskola EBF Maesmat Pássabe akumula estudante hamutuk na’in-490 ho totál profesór hamutuk na’in-10.
Notísia relevante: Parlamentu hakarak re-ativa merkadu tradisionál fronteira
Jornalista: Abílio Elo Nini
Editor Evaristo Soares Martins
