KOVALIMA, 20 Juñu 2025 (TATOLI)-Prezidente Autoridade Munisípiu Kovalima, Miguel Armada Cardoso, enkoraja komunidade iha aldeia Hasana, suku Tashilin, postu administrativu Zumalai, munisípiu Kovalima hasa’e produsaun iha rai-laran, nune’e labele konsumu hahán ne’ebé kontaminadu ho kímiku.
Autoridade Kovalima enkoraja komunidade hasa’e produsaun iha rai-laran, nune’e komunidade labele depende de’it foos importadu husi Nasaun Vietname.
“Xefe suku administradór ho diretór sira presiza dezenvolve ita-nia produdu iha rai-laran, produtu ne’ebé mak ita iha ha’u haree iha nasaun sira seluk hanesan han mak produtu lokál”, PAM Kovalima hato’o iha nia diskursu molok lansa kampaña nasionál semana nutrisaun iha Zumalai, ohin.
Autoridade ne’e dehan foos ne’ebé importadu hosi nasaun Vietname ho folin $12 kualidade ladi’ak ba ema atu konsumu.
“Ita baruk-teen, tanba ne’e ita depende de’it foos importadu, di’ak liu mak hasa’e produsaun hare kulit”, nia dehan.
Autoridade mós fó hanoin ba estensionista sira eduka komunidade oinsá kuda modo. Ho nune’e responde implementasaun programa merenda eskolár maibé komunidade la kuda modo tahan, nune’e osan la sirkula iha Kovalima sirkula fali iha munisípiu seluk tanba lakohi servisu.
“Ha’u fiar ita rasik servisu hodi kria kondisaun no produsaun produtu iha rai-laran, orsamentu merenda eskolar sirkular de’it iha Kovalima labá fali munisípiu sira seluk, tanba produtu lokál mak ai-han ne’ebé fó nutritivu”, nia dehan.
Tanba ne’e PAM orienta ba xefe suku no administradór postu administrativu sira atu organiza komunidade oinsá halo toos hodi hasa’e produsaun iha rai-laran hodi bele responde ba nesesidade.
Notísia relevante: Produsaun hare-kulit iha Kovalima atinji tonelada rihun-12 resin
Jornalista : Celestina Teles
Editora : Rita Almeida
