MALÁZIA, 20 Juñu 2025 (TATOLI) – Prezidente Repúblika (PR), José Ramos Horta, kinta ne’e iha Malázia hasoru malu ho Primeiru-Ministru Malázia, Anwar Ibrahim hodi diskute kona-ba preparativu sira ba simeira ASEAN ba da-47 hodi simu Timor-Leste hanesan membru plenu.
Daudaun ne’e, Malázia mak hanesan Prezidénsia ba ASEAN no Timor-Leste nia adezaun nu’udar membru plenu hala’o fulan-outubru mai ne’e iha Malázia.
“Ha’u ho Primeiru-Ministru Anwar ko’alia kona-ba simeira ASEAN nian ne’ebé ita sei tama hanesan membru plenu iha fulan-outubru, ko’alia kona-ba ita nia preparasaun sira hotu,” Ramos Horta hateten ba jornalista sira iha Malázia, kinta ne’e.
Ramos Horta hateten, nasaun hotu membru ASEAN iha lian ida hodi aseita Timor-Leste nia adezaun no sei ofisializa iha fulan-outubru tinan ne’e.
Xefe Estadu haktuir, nasaun hotu-hotu aseita ona Timor-Leste nia adezaun, balun aprezenta ona sira-nia programa atubele haruka funsionáriu no polítiku sira hodi realiza formasaun espesiál.
“Programa ida rasik ha’u ko’alia ho Primeiru-Ministru Singapura no Ministru Negósiu Estranjeiru Singapura atu halo programa espesiál ida atu nune’e lider polítiku timoroan sira, líder emprezariál, akadémika balu bele ba Singapura halo kursu iha meiu oioin, bele online no bele partisipa direita, kursu hirak-ne’e bainbain halo iha Estadu Unida Amérika no balu halo iha Singapura, ne’e halo hanesan formasaun ba lideransa la’ós de’it polítika maibé ba futuru líder jerasaun foun sira,” Xefe Estadu hateten.
Ramos Horta hatutan, kona-ba kapasita rekursu umanu hodi sai hanesan líder, Singapura prontu ona atu apoiu Timor-Leste bainhira sai membru plenu ASEAN.
Nia dehan, kritéria ba formasaun ne’e sei haree uluk lai ho Primeiru-Ministru no Fidelis Magalhães tanba nia uluk estuda mestradu haat, sai doutoramentu hola parte mós iha Governu no nia agora ema ida laiha partidu.
“Hamriik independente ho nune’e mak ha’u husu nia atu prepara dokumentu hodi submete ba Primeiru-Ministru atu hetan de’it luz verde tanba inisiativa ne’e Prezidente Repúblika nian atu ajuda ita-nia polítika sira iha kuadru médiu no superiór sira bele hetan formasaun di’akliu,” Antiigu Ministru Negósiu Estranjeiru no Kooperasaun (MNEK) ne’e konklui.
Jornalista: Hortencios Sanchez
Editór: Evaristo Soares Martins
