DILI, 23 Juñu 2025 (TATOLI)–Autoridade Munisípiu Dili (AMD) sei orienta ekipa saneamentu atu halo identifikasaun ba ai-funan ne’ebé maran no mate iha dalan protokolu hodi bele tau-atensaun didi’ak.
Prezidente Autoridade interinu Munisípiu Dili, António Agosto Guterres, hateten, ekipa saneamentu sempre rega ai-funan iha dalan.
“Ai-funan ne’e mate tanba ita foku liu ba lixu, entaun dalaruma sira ladún rega hodi rezulta ai-funan ne’e mate. Entaun, ita mós presiza haree filafali problema ne’e. Ami sei orienta parte saneamentu atubele tau-matan hodi kuidadu ninia beleza no furak nafatin, tanba Dili ne’e boot loos, entaun ita presiza halo akompañamentu diáriamente atubele fó atensaun nafatin ba ai-funan sira-ne’ebé iha sidade laran,” Prezidente Autoridade informa ba Ajénsia TATOLI, via telefónika, Segunda ne’e.
Notísia relevante : PAM enkoraja komunidade Hasana hasa’e produsaun rai-laran
AMD sei orienta ekipa saneamentu hodi halo identifikasaun ba ai-funan sira-ne’ebé mate.
“Haree ai-funan sira mate ona ka bele rega hodi moris ka oinsá? karik maran liu ona mak ita sei kuda fali para fó matak ba sidade, tanba ne’e ita sei orienta ekipa hodi kuidadu nafatin ai-funan sira iha dalan protokolu,” nia akresenta.
Biban ne’e, Prezidente Autoridade interinu husu mós ba mídia sira-ne’ebé sai hanesan matan no tilun, ne’ebé sempre ligasaun di’ak ho movimentu sira ne’e hodi haree ai-funan ne’ebé mate bele informa ba AMD hodi mobiliza ekipa ba rega.
“Ami seidauk hetan orientasaun, entaun orsida ha’u orienta ekipa jestaun saneamentu para bá halo identifikasaun,” nia katak.
Jornalista : Alexandra da Costa
Editora : Julia Chatarina
