DILI, 23 Juñu 2025 (TATOLI)–Autoridade Protesaun Sivíl (APC, sigla portugés) hamutuk ho organizasaun Programa Ai-han Mundiál (WFP, sigla inglés), Segunda ne’e, realiza workshop ba preparasaun lojístika umanitária hodi hatan situasaun emerjénsia ba dezastre naturál.
Sekretáriu Estadu Protesaun Sivíl, Domingos Mariano Reis, hateten, objetivu husi programa ne’e atu promove diskusaun kona-ba Kriasaun Grupu Servisu Tékniku Lojístika (KGSTL) ba Timor-Leste atu promove sistema lojístika emerjénsia ne’ebé koordenadu, efisiente no iha tempu loloos.
Atividade ne’e mós sei ajuda aliña asaun grupu traballu ho prioridade nasionál sira.
“Autoridade Protesaun Sivíl nu’udar líder ba koordenasaun resposta emerjénsia iha Timor-Leste, hala’o papél sentrál ida iha inisiativa ida-ne’e,” Sekretáriu Estadu informa iha salaun City-8, Manleuana.
Notísia relevante : APC rejista dezastre naturál neen iha Juñu nia laran
Workshop ne’e realiza durante loron-rua hodi kapasita jestór no tékniku sira atu hasa’e koñesimentu kona-ba jestaun lojístika hodi bele halo preparasaun ba hatan situasaun emerjénsia ba dezastre naturál iha Timor-Leste.
Nia konsidera, kapasitasaun rekursu umanu ne’e importante hodi hasa’e koñesimentu no jestaun bainhira akontese dezastre ho eskala boot sira bele hatene ona maneira atuasaun rasik.
“Timor-Leste hasoru risku oinoin tanba nia jeografia no klima, entaun presiza haforsa koordenasaun lojístika iha setór hotu ne’e importante tebes atu asegura katak resposta emerjénsia sira efisiente no atinje sira ne’ebé presiza liu,” nia katak.
Atividade ne’e sai parte ida husi kompromisu atu harii nasaun ida-ne’ebé reziliénte no preparadu liu.
Reprezentante WFP iha Timor-Leste, Jacqueline de Groot, hateten, WFP, liuhusi FBPP no nia parseiru ho Grupu Lojístika serbisu hamutuk ho instituisaun nasionál sira atu haforsa preparasaun lojístika iha nível oin-oin.
“Hodi investe iha koordenasaun lojístika emerjénsia ohin, Timor-Leste foti ona pasu konkretu sira hodi hamenus impaktu dezastre iha tempu aban,” nia katak.
Envolvimentu estratéjiku ne’e mak faze importante atu harii sistema ne’ebé forte liu hodi salva moris no proteje maneira buka moris.
Worshop ne’e partisipa husi kargu xefia APC, parseiru dezenvolvimentu, Polísia Nasionál Timor-Leste (PNTL), inklui ajente liña ministeriál seluk ne’ebé relevante ho APC.
Jornalista : Alexandra da Costa
Editora : Julia Chatarina
