VIKEKE, 23 Juñu 2025 (TATOLI)—Konsellu Kombatente Libertasaun Nasionál (CCLN, sigla portugés) munisípiu Vikeke apoia ekipamentu saúde nian ba servisu saúde munisipál Vikeke hodi halo atendementu ba komunidade ka pasiente sira.
Notísia Relevante: CCLN simu ekipamentu saúde husi Veteranu Nova Zelándia
“Ekipamentu ne’ebé ami apoia ba saúde Vikeke ho tipu oi-oin. Apoia sira-ne’e mai husi rai-li’ur tuir pedidu Klínika Veteranu Baukau mak ba husu rai-li’ur oferese ba ami barak liu. Tan ne’e, mak ami fahe tutan ba fasilidade saúde sira iha Vikeke, apoia ba ita-nia komunidade bainhira tratamentu bele uza fasilidade sira suporta ba pesoál saúde sira halo atendementu ba ita-nia komunidade sira-ne’ebé moras,” Prezidente CCLN munisípiu Vikeke, Adiriano Camara ‘Lentil’, hateten ba TATOLI, iha Internamentu Vikeke, ohin
Prezidente KKLN Vikeke ne’e profunda, apoia ekipamentu médiku husi veteranu ne’e hakarak solidariza ba parte saúde sira hodi fó tratamentu ba povu Vikeke tomak.
Reprezentante Diretór Servisu Saúde Vikeke, Fernando Soares, hato’o agradesementu ba CCLN Vikeke ne’ebé apoia ona ekipamentu médikamentu ba servisu saúde munisipál Vikeke hodi reforsa pesoál saúde sira halo atendementu ba komunidade Vikeke.
“Ami hato’o obrigadu barak ba ita-nia aman veteranu sira-nian apoiu ekimapmentu mediku. Liuhusi apoia sira-ne’e hodi ami bele uza halo atendementu ba komunidade iha munisípiu Vikeke,” nia dehan.
Apoia ekipametu ne’ebé CCLN Vikeke oferese ekipamentu tratamentu ba saúde nian liuliu ba área prevensaun moras sira iha munisípiu Vikeke.
Ekipamentu medikamentu ne’ebé CCLN Vikeke oferese ba servisu saúde Vikeke totál hamutuk kaixa 25 mak hanesan Surgigloves kaixa 10, Safer Healt Heare kaixa 4, Surgimask Level 2 kaixa 5, Apprechi Medical kaixa ida, Likeskin kaixa ida, Aurisure Sheath kaixa ida, Stetoscope 1000pcs kaixa ida, M.I.A order no115118 c/no52 kaixa ida no M/Devices.
Xefe sentru saúde postu Vikeke, João Corte Real, hateten ekipamentu ne’ebé parte CCLN oferese ba servisu saúde munisípiu Vikeke no entrega tutan ba Internamentu Vikeke hodi uza ba tratamentu.
“Ha’u sente apoia ekipamentu médiku ne’e kompletu ba ami ona, maibé ami hakarak husu tan ba CCLN hodi apoiu tan ekipamentu ekipamentu leno moras laran no parte li’ur nian. Apoiu sira-ne’ebé ohin ami simu sei fó atendementu ba ita-nia komunidade ne’ebé mai halo tratamentu no ami mós sei fahe tutan ba postu saúde sira hanesan thermometer,” nia dehan.
Ekipamentu ne’ebé CCLN oferese ajuda ona interanamentu hodi tulun moras sira-ne’ebé mai husi postu administrativu lima iha munisípiu Vikeke.
Serimónia distribuisaun ekipamentu saúde ne’e entrega diretamentu husi Prezidente CCLN ba reprezentante diretór saúde Vikeke kontinua entrega ba xefe sentru saúde Vikeke ne’ebé responsável ba internamentu.
Jornalista : Vitorino Lopes da Costa
Editór : Cancio Ximenes
