DILI, 23 Juñu 2025 (TATOLI)-Parlamentu Nasionál (PN) diskute projetu rezolusaun ne’ebé aprezenta husi deputadu bankada opozisaun FRETILIN hodi husu atu halo apuramentu ba faktu kona-ba resepsaun no deportasaun sidadaun Filipina, Arnolfo Teves Jr, maibé la pasa.
“Rezultadu votasaun ba rezolusaun a favór 20, kontra 34 no abstensaun haat, ne’ebé rezolusaun ne’e la pasa”, Prezidente Parlamentu Nasionál, Maria Fernanda Lay, fó sai iha sala plenária.
Deputadu Partidu Demokrátiku, Mariano Malik, dehan tanba iha separasaun podér, entaun presiza haree fali aktu ne’ebé Governu halo ne’e fila ba kompeténsia Ezekutivu nian.
“Governu hili husi Parlamentu, sira [Governu] iha kompeténsia atu deside buat ruma di’ak ba nasaun [no ba] interese komún. Tanba ne’e, ita presiza haree fali artigu 115, 116, 117 Konstituisaun kona-ba kompeténsia Governu nian”, akresenta.
Deputadu husi bankada Governu ne’e sujere proponente sira atu halo de’it keixa ba Providoria Direitu Umanu no Justisa (PDHJ, iha portugés) hodi labele envolve órgaun kolejiál hanesan Parlamentu hodi sai fali hanesan fatin investigasaun ba nia Governu rasik, nune’e bankada Governu sei la vota a favór ba rezolusaun referida.
Deputadu CNRT, Patrocínio dos Reis Fernandes, konsidera katak projetu rezolusaun ne’e atu mai órgaun soberanu Parlamentu Nasionál, nu’udar órgaun kolejial ne’ebé tau fali ba kestaun kona-ba desizaun Estadu nian ne’ebé foti ona.
Entretantu, deputadu FRETILIN, Aniceto Guterres, kontinua insiste katak rezolusaun ne’e iha nia fatin duni.
“Ha’u komprende ita-boot sira rejeita rezolusaun ne’e, tanba orsida sei investiga José Ramos Horta hanesan mós Prezidente Repúblika, tanba nia mak haruka nia asesór ida ba simu ema ne’e. Enkuantu Governu, iha momentu ne’ebá Primeiru-Ministru Taur Matan Ruak la hatán”, nia salienta.
Hodi hatutan “más ne’e ita keta haluha krime ataka órgaun pesoál ba instituisaun demokrátika hanesan mós ho nia funsionamentu. Laiha buat ida, ita-boot sira rejeita, to’o loron ida FRETILIN kuandu fila ba ukun sei loke investigasaun”, nia afirma.
Notísia relevante: FRETILIN aprezenta rezolusaun parlamentár hodi husu investigasaun kona-ba deportasaun Arnolfo Teves
Jornalista: Nelson de Sousa
Editora: Maria Auxiliadora
