KOVALIMA, 23 Juñu 2025 (TATOLI) – Prezidente Institutu Nasionál Seguransa Sosiál (INSS) Arlindo Pinto, segunda-ne’e, lansa pagamentu pensaun sosiál ba idozu no invalidés, faze daruak, iha suku Kamnasa Postu administrativu Suai, munisípiu Kovalima.
“Instituisaun Seguransa Sosiál kontratu ho Banku Nasionál Komérsiu Timor-Leste (BNCTL) mak halo pagamentu ba ita-boot sira atu jere ho di’ak ita-nia orsamentu ne’e. Ami akompaña”, Prezidente INSS, Arlindo Pinto, hato’o iha nia diskursu, iha sede suku Kamnasa, ohin.
Autoridade másima INSS ne’e konta, molok ne’e INSS mak hala’o pagamentu direta maibé tanba hetan krítika ho nune’e prosesu pagamentu pensaun ba idozu no invalidés liuhusi banku nune’e hafoin finaliza pagamentu orsamentu restu banku haruka fila ba Estadu.
Ho nune’e Governu muda polítika prosesu pagamentu pensaun ba idozu no invalidés liuhusi Banku tanba molok ne’e hothotu forma iha sukursál atu simu pensaun maibé governu muda lei hodi aumenta pensaun ba idozu no invalidés 60-69 kada fulan $ 60.00, idade 70-79 kada fulan $ 80 husi idade 80 ba leten kada fulan $ 100.
Iha sorin seluk, Xefe Suku Kamnasa, Fernando Noronha, fó hanoin ba benefisiáriu sira iha suku Kamnasa, “Ha’u fó hanoin de’it osan ne’ebé ita-boot sira simu atu trata ita-boot sira-nia saúde la’ós lori ba joga no halo lia, maske buat hotu ita-boot sira-nia direitu maibé simu osan ne’e tenke hanoin saida mak presiza ita-boot sira atu halo”.
Tuir oráriu ne’ebé TATOLI asesu hatudu katak pagamentu ba idozu no invalidés hala’o iha munisípiu Kovalima hahú iha loron 23 to’o loron 26 Juñu ne’e.
Iha loron 23 Juñu ne’e funsionáriu husi BNCTL hala’o pagamentu ba idozu no invalidés iha Postu administrativu Suai 2084, no Postu administrativu Fatululik ho nia benefisiáriu hamutuk 239.
Loron 24 hala’o pagamentu iha postu Maukatar ho nia benefisiáriu hamutuk 1068 no Postu administrativu Tilomar benefisiáriu 821.
Iha loron 25 Juñu hala’o pagamentu iha Postu administrativu Fohorem ba benefisiáriu 579 ho Fatumea 487 iha loron 26 hala’o pagamentu iha Postu administrativu Zumalai ho totál benefisiáriu hamutuk 1774.
Fó hanoin fali katak Ministériu Solidariedade sosiál no Inkluzasaun Sosiál liuhusi Institutu Nasionál seguransa Sosiál hala’o pagamentu pensaun ba idozu no invalidés faze ikus 2024 no faze ba dahuluk iha 2025 ne’e hala’o iha loron 17 Marsu 2025 ne’e.
Iha tinan-2025, Governu Timor-Leste liuhusi Ministériu Solidariedade Sosiál no Inkluzaun (MSSI) no Institutu Nasionál Seguransa Sosiál (INSS), kontinua implementa programa pensaun sosiál ba idozu no invalidés iha munisípiu sira hotu.
Kondisaun no valór pensaun
Pagamentu pensaun sosiál hala’o ba faze trimestrál, ho valór bazeia ba kategoria idade:
- 60–69 tinan: $60
- 70–79 tinan: $80
- 80 tinan ba leten: $100
Idozu no Invalidés
- Idozu: Ema ho idade 60 ba leten.
- Invalidés: Ema ho limitasaun permanente atu halo servisu, tuir avaliasaun INSS.
Prosesu pagamentu
Pagamentu hala’o liuhusi Banku Nasionál Komérsiu Timor-Leste (BNCTL), iha sede suku ka uza ATM. Benefisiáriu presiza lori:
- Kartaun Eleitorál (KE)
- Billete Identidade (BI)
- Foto 3×4
- Kaderneta Kór Kinur (ba benefisiáriu tuan)
Notísia relevante: https://tatoli.tl/2025/03/17/mssi-hahu-halo-pagamentu-ona-pensaun-ba-idozu-no-invalidés-iha-kovalima/
Jornalista:Celestina Teles
Editór: Rafael Ximenes de A. Belo
