KOVALIMA, 17 Marsu 2025 (TATOLI) – Ministériu Solidariedade Sosiál no Inkluzasaun (MSSI) liuhusi Institutu Nasionál Seguransa Sosiál servisu hamutuk ho Banku Nasionál Komérsiu Timor-Leste (BNCTL) hahú hala’o ona pagamentu pensaun sosiál ba idozu no invalidés, iha munisípiu Kovalima.
Benefisiáriu Candido Barros, haktuir, nia parte simu pensaun sosiál ba dala tolu ona ne’ebé mak Ministériu Solidariedade Sosiál no Inkluzasaun (MSSI) halo pagamentu atu uza ba nia nesesidade uma laran.
“Ohin ha’u simu pensaun sosiál husi Governu hamutuk $ 360 hodi uza ba nesesidade rasik no balun ami uza hodi selu ba ami-nia oan sira nia eskola”, Candido Barros informa ba TATOLI, iha sede Suku Debos, ohin.
Pensaun ne’ebé benefisiáriu simu nia parte dehan ba trimestrál dahuluk nian mak hanesan trimestre dahaat iha tinan-2024 no trimestre ba dahuluk iha 2025 ne’e hamutuk mak nia simu ho valór osan hamutuk $ 360.
Iha sorin seluk, Xefe Suku Debos, Postu Suai, Munisípiu Kovalima, Agostinho da Silva, bazeia ba oráriu pagamentu ba idozu no invalidés hala’o iha postu Suai no Fatululik ne’ebe mak daudaun ne’e pagamentu la’o hela.
“Ohin hala’o ona pagamentu pensaun sosiál ba idozu no invalidés molok hahú hala’o pagamentu ha’u orienta ba xefe aldeia sira atu fó avizu ba benefisiáriu sira atu simu pensaun sosiál iha sede suku”, nia relata.
Prosesu pagamentu, iha benefisiáriu balun foti nia direitu pensaun uza de’it ATM (Authomatic Teller Machine) no benfisiáriu ne’ebé la iha ATM mak funsionáriu husi BNCTL hala’o pagamentu iha sede suku bazeia ba oráriu ne’ebé mak fó sai ona.
Benfisiáriu ne’ebé mak uza ATM molok ohin hala’o pagamentu, benefisiáriu sira foti ona sira-nia pensaun sosiál ne’ebé mak Govenru halo pagamentu.
“Governu hala’o pagamentu bazeia informasaun ne’ebé ami asesu pagamentu ba benefisiáriu sira durante fulan neen maibé kona-ba dadus ami la hatene tanba INSS la entrega lista benefisiáriu idozu no invalidés la hanesan ho tinan kotuk,antes atu halo pagamentu sira entrega lista maibé ba tinan ne’e la fó”, nia dehan.
Bazeia ba instrusaun husi Banku Sentrál ba BNCTL númeru 5/2017 relasiona ho kartaun identidade rua ne’ebé defini iha artigu 10.o husi instituisaun, dokumentu ne’ebé presiza atu mak hanesan tuir mak ne’e.
Ba benefisiáriu no idozu foun presiza lori dokumentu mak hanesan foto 3×4 tahan ida, BI no KE orijinál no foto kopia tahan ida. Ba benefisiáriu tuan ne’ebé mak seidauk entrega kofipa KE no BI iha faze dahuluk to’o ba datoluk 2024 husu atu kompleta iha pagamentu faze dahuluk iha 2025 ne’e no ba benfisiáriu idozu no invalidés atu lori kaderneta Kór kinur, KE, BI orijinál.
Bazeia ba dadus benefisiáriu idozu no invalidés ne’ebé asesu ba pensaun sosiál , husi munisipiu Kovalima mai husi postu administrativu Fatululik, Fatumea, Fohorem, Tilomar, Maukatar, Suai no Zumalai hamutuk 7.053.
Tuir oráriu pagamentu ne’ebé jornalista TATOLI asesu katak, iha loron 17 Marsu funsionáriu BNCTL hala’o pagamentu iha postu Fatululik no postu Suai.
Iha loron 18 hala’o pagamentu iha postu Fohorem no postu Fatumea, iha loron 19 marsu hala’o pagamentu iha postu Maukatar no Tilomar. Enkuantu, iha loron 20 hala’o pagamentu iha postu Zumalai.
Fó hanoin fali katak inísiu 2024 ne’e INSS halo pagamentu pensaun sosiál ne’ebé fahe ba kategória tolu ho nia valór la hanesan bazeia ba kategória idade mak idade 60-70 ho valór $ 60, idade 70-80 ho valór $ 80 no idade 80 ba leten ho nia valór $ 100.
Jornalista: Celestina Teles
Editór: Rafael Ximenes de A. Belo
