DILI, 24 Juñu 2025 (TATOLI)—Burger King Internasionál kontrata auditór independente husi Jakarta, Indonézia hodi halo auditioria surpreza ba Burger King Kolmera no Timor Plaza, Dili, iha loron 05 Juñu 2025, ne’ebé ikus mai hetan rezultadu di’ak.
Auditoria ne’e inklui operasaun hotu no prátika ba ai-han seguru, ekipamentu, manutensaun, formasaun ba funsionáriu inklui esperiénsia konsumidór.
Burger King harii iha tinan 11 liubá husi empreza East Timor Trading (ETT), ne’ebé hahú ho ninia rekursu umanu ema estranjeiru 90% no timoroan 10%, maibé tanba formasaun no kolaborasaun di’ak entre ema estranjeiru ho timoroan sira, nune’e ohin loron opera ho timoroan 90% no estranjeiru 10%.
Diretora Ezekutiva East Timor Trading, Milena Pires, hateten, Burger King durante ne’e halo parte iha kadeia globál, tanba ne’e husi parte internasionál sempre halo auditoria hodi verifika prosedimentu estabelesidu, tanba Burger King ne’e la’ós eziste de’it iha Timor-Leste maibé iha mós fatin seluk.
“Prosesu auditoria ne’e atu asegura katak buat ne’ebé define hanesan standart operation food issues ne’ebé ita tuir iha Timor bele salva guarda ba produtu ne’ebé ita fa’an iha Timor sei hanesan ho produtu ne’ebé sira fa’an iha nasaun seluk ne’ebé Burger King mós eziste,” Jerente empreza informa ba Ajénsia TATOLI iha edifísiu ETT, Delta 01, Tersa ne’e.
Notísia relevante : East Timor Trading Group kompromente kontinua halo investimentu iha TL
Jestór empreza ne’e haktuir, ekipa avaliadór mai derrepente no tama iha Burger King iha Kolmera no Timor Plaza hodi halo avaliasaun ba prosedimentu, atendimentu, kualidade ai-han, jestaun, fatin ne’e rasik, ijiene ba fatin, no dijitál.
“Rezultadu husi auditoria avaliasaun kona-ba ami-nia prosedimentu ne’e Burger King Kolmera hetan valór 97,4% no iha parte Timor Plaza hetan 96,2%, avaliasaun ne’ebé sira halo kuaze prosedimentu sira kumpre 100%, maibé iha prosedimentu ida mak menus uitoan hanesan dijitál operasaun (kuadru dijitál ba produtu ladún iha kor ne’ebé espesífiku),” nia konta tuir.
Maski nune’e, parte ETT apresia tanba maioria ema ne’ebé serbisu iha Burger King hanesan timoroan, hatudu presiza hatuur prosedimentu hodi mantein integridade ba produtu no fó servisu di’ak liu ba kliente sira tuir limpeza fatin no preparasaun hahán.
Milena Pires garante, operasaun no prátika hotu ne’ebé Burger King iha Timor-Leste opta tuir padraun estabelesidu, rekezitu no prosedimentu.
“Menus absolutamente sira sei hadi’a kedas hodi garante kualidade. Tanba ne’e mak ba ha’u orgullu boot haree rezultadu ida hanesan ne’e tanba prosesu auditoria ne’e sira mai ho supreza la’ós informa mak ita prepara,” nia katak.
Dezentendimentu ho AIFAESA
Diretora Ezekutiva empreza dehan, ekipa husi Autoridade Inspesaun Fiskalizasaun Atividade Ekonómika Sanitária no Alimentár (AIFAESA) ne’ebé antes ne’e halo vizita ba Burger King Timor Plaza no deklara katak uza materiál liu prazu hodi tein ne’e hanesan dezentendimentu.
“Ida-ne’e dezintendidu tanba estabelesimentu Burger King tenke tuir padraun internasionál. Kona-ba na’an ne’ebé uza ba tein tenke formatu ho kabuar no kualidade hanesan ho Burger King sira iha fatin seluk, maibé tanba na’an ne’e importa husi rai-li’ur no sira tau iha pakote mak to’o dalan dos ne’e kleuk, entaun ami labele uza tanba ne’e regra Burger King nian,” nia esplika.
Nune’e, ekipa atu soe pakote ida ninia dos kleuk, maibé seidauk soe na’an sira-ne’e tanba presiza dokumenta no hatama ba lista sasán a’at hodi fó fali informasaun ba importadór produtu. Aleinde ne’e, traballadór sira okupadu ho kliente haluha soe.
“Maibé na’an sira-ne’e la a’at no tuir nafatin prazu ne’ebé konsumu maibé tanba de’it regra Burger King rigorozu mak ita labele uza hodi hamosu dezentendimentu entre AIFAESA, infelizmente ami mós koko esplika ba sira maibé sira la kompreende hodi hanoin katak na’an ne’e aat,” Milena Pires katak.
Notísia relevante : AIFAESA husu empreza Burger King hato’o reklamasaun bainhira la satisfáz ho servisu AIFAESA
Diretora empreza dehan Burger King la’ós estabelesimentu ne’ebé ema hotu bele loke no halo tuir hakarak, maibé iha prosedimentu ne’ebé tuir nia dalan no atu garante kualidade produtu importadu, maibé iha produtu agríkola balun hanesan tomate, lis bombai no alfase mak sosa iha agrikultura Timor.
“Ida-ne’e sai hanesan kontribuisaun ekonomia ida ba Timor-Leste tanba bele ajuda kria kampu traballu ba timoroan sira, ajuda kapasita sira-nia abilidade iha kulinária hahán internasionál, halo transformasaun ba ema nia karreira, ajuda investe iha setór agrikultura no investe mós taxa ba Estadu,” nia hato’o.
Daudaun ne’e ema na’in-35 mak serbisu iha Burger King Kolmera no Timor Plaza. Prosesu rekrutamentu rekursu umanu la haree ba kualifikasaun maibé haree ba badina, onestidade, no kompromisu ba ninia serbisu.
Jornalista : Alexandra da Costa
Editora : Julia Chatarina
