Jogu kontra Filipina determina destinu Timor-Leste iha AFC Asian Cup 2027
DILI, 14 Outubru 2025 (TATOLI)—Jogu kontra Filipina iha volta daruak faze kualifikasaun Grupu A sei determina detinu Selesaun Nasionál Timor-Leste atu hakat bá kualifikasaun AFC Asian Cup 2027 ne’ebé sei realiza iha Arábia Saudita.
Treinadór Prinsipál Selesaun Nasionál Timor-Leste, Zé Pedro konsidera jogu kontra Filipina presiza gaña vitória mezmu rekoñese katak la fásil hafoin istorikamente hatudu Timor-Leste derrota 1-4 iha volta dahuluk.
“Jogu ida-ne’e desizivu maibé ida-ne’e la’ós fásil tanba Filipina nu’udár ekipa forte iha grupu A,” Zé Pedro hateten liuhosi konferénsia imprensa ne’ebé realiza iha Estádiu Clark, Manila, Segunda ne’e.
Atu atinje mehi gaña pontu kontra Filipina, Zé Pedro koko halo mudansa estratéjia inklui posibilidade troka line up jogadór mezmu seidauk fó-sai ba públiku. Enkuantu atensaun dahuluk mak rekupera hikas mentalidade inklui fíziku hafoin derrota no viajen husi Darwin-Austrália ba Manila-Filipina.
“Ami sei atake hodi mellora di’ak liután nune’e bele prodús golu,” Zé Pedro argumenta.
Notísia relevante: Zé Pedro rekoñese Filipina ekipa forte no kompromitidu sei la repete erru
Tuir regra faze datoluk klasifikasaun AFC Asian Cup 2027, kada grupu sei reprezenta nasaun ida, iha-ne’ebé haree ba tabela klasifikasaun Grupu A, nasaun Filipina no Tazaskistaun iha oportunidade hadau spot ida atu hakat bá AFC Asian Cup 2027 tanba pontu ne’ebé rekollidu husi nasaun rua ne’e hamutuk hitu (7) hotu husi jogu tolu.
Enkuantu, Timor-Leste provizoriamente iha pozisaun datoluk tabela klasifikasaun ho pontu tolu (3), maibé sei iha oportunidade bainhira rezulta manán kontra Filipina. Jogu rua ikus kontra Tazaskistaun no Maldiva obrigadu tenke manán nune’e bele gaña pontu 12 hodi hetan tikete hakat bá Tasa AFC Asian Cup 2027.
Jornalista: Natalino Belo
Editór: Xisto Freitas da Piedade
