DILI, 14 Outubru 2025 (TATOLI)—Treinadór Prinsipál Selesaun Nasionál Timor-Leste, Zé Pedro rekoñese Filipina nu’udár ekipa forte no kompromitidu sei la repete erru ne’ebé akontese iha jogu volta dahuluk iha Darwin-Austrália, 09 Outubru liubá.
Zé Pedro esplika Filipina iha kompozisaun jogadór ne’ebé iha kualidade di’ak no nakonu ho esperiénsia europeia maibé nu’udár ekipa futeból prontu enfrenta situasaun hotu liuhosi evaluasaun iha jogu volta dahuluk hafoin derrota 1-4 iha Darwin-Austrália.
“Ami rekoñese Filipina ekipa forte maibé hafoin halo analiza erru ho evalua hotu ami sei hatudu jogu di’ak kontra Filipina maski difisil,” Zé Pedro hateten liuhosi konferénsia imprensa iha Manila, Filipina, Segunda ne’e.
Nia relata preparasaun dahuluk ne’ebé halo mak jogadór sira presiza rekuperadu hikas fíziku hafoin viajen dook husi Darwin-Austrália ba Manila-Filipina.
Notísia relevante: Selesaun Nasionál to’o Filipina, aban kontinua jogu volta daruak
Aleinde ne’e, nia hatutan, halo analiza ba jogu Filipina nian iha volta dahuluk nune’e implementa estratéjia ne’ebé sei foku ba atake mezmu fó prioridade ba defensiva nune’e atinje objetivu prodús golu bainhira hala’o jogu kontra Filipina iha volta daruak ne’ebé realiza iha Estádiu Clark, Manila.
Zé Pedro tenik Filipina sei jogu atake tanba aproveita oportunidade iha área defeza maibé Timor-Leste sei nakloke nune’e bele kontra-atake hodi hadau pontu iha jogu referidu.
Entretantu, bazeia ba pontu iha tabela klasifikasaun Grupu A, ekipa Lafaek presiza gaña vitória hodi loke oportunidade hakat bá kompetisaun AFC Asian Cup 2027 ne’ebé sei realiza iha Arábia Saudita.
Filipina lidera provizória tabela klasifikasaun ho pontu hitu (7), rezultadu manán rua (2) no impata ida (1), enkuantu Timor-Leste nafatin mantein iha pozisaun datoluk ho pontu tolu (3) hafoin manán ida (1) no derrota dala-rua (2).
Tazaskistaun iha pozisaun daruak ho pontu hitu (7), rezultadu husi manán rua (2) no impata ida (1), pozisaun dahaat okupa husi Maladewa ho pontu 0 hafoin derrota iha jogu dala-tolu (3).
Jornalista: Natalino Belo
Editór: Xisto Freitas da Piedade
