DILI, 13 Outubru 2025 (TATOLI)–Ekipa Selesaun Nasionál Futeból Timor-Leste to’o ona Manila, Filipina, hodi halo preparasaun antes kontinua jogu volta daruak kontra Filipina faze kualifikasaun Grupu A AFC Asian Cup 2027.
Ekipa selesaun lidera husi treinadór prinsipál Zé Pedro dezloka husi Darwin-Austrália no to’o iha Manila, Filipina iha loron-Domingu, 12 Outubru, iha-ne’ebé kontinua halo preparasaun treinu antes kontra Filipina iha loron-Tersa, 14 Outubru.
“Selesaun Nasionál Timor-Leste hala’o hela sesaun treinu preparatóriu atu hasoru uma-na’in Filipina,” hakerek nota imprensa ne’ebé TATOLI asesu, Segunda ne’e.
Komentatór Futeból, Joaquim Lopez Vide argumenta mezmu ho kalendáriu jogu entre ekipa rua limitadu maibé importante dezlokasaun ekipa selesaun nasionál to’o iha Manila ho kondisaun kontrolada no kontinua halo preparasaun antes loron-rua joga hasoru Filipina.
“Espera ho tempu ne’ebé badak ekipa selesaun nasionál iha kondisaun di’ak nune’e bele halao jogu ho rezultadu pozitivu,” Joaquim Vide informa ba TATOLI iha Bairro dos Grilos, Segunda ne’e.
Notísia relevante: Asu Fuik Filipina hurlele Lafaek 1-4
Vide iha esperansa ekipa treinadór halo ona avaliasaun ba jogu volta dahuluk hafoin derrota 1-4 no preparadu di’ak liután ho gaña hikas vitória ba Timor-Leste.
Selesaun Filipina lidera provizória tabela klasifikasaun ho pontu hitu (7), rezultadu manán rua (2) no impata ida (1), enkuantu Timor-Leste nafatin mantein iha pozisaun datoluk ho pontu tolu (3) hafoin manán ida (1) no derrota dala-rua (2).
Entretantu, Tazaskistaun iha pozisaun daruak ho pontu haat (4), rezultadu husi manán ida (1) no impata ida (1), pozisaun dahaat okupa husi Maladewa ho pontu 0 hafoin derrota jogu rua (2).
Jornalista: Natalino Belo
Editór: Xisto Freitas da Piedade
