DILI, 20 Outubru 2025 (TATOLI)—Sekretaria Estadu Komunikasaun Sosiál (SEKOMS) prevee millaun $5,5 iha Orsamentu Jerál Estadu (OJE) 2026.
“Husi orsamentu millaun $5,5 ne’e, millaun $2-resin sei transfere ba RTTL, E.P atubele hala’o funsionamentu durante tinan 2026 nomós atu transfere ba Rádiu Komunidade atubele dezenvolve, transfere ba organizasaun jornalista sira no transfere mós ba Sentru audivizuál Max Sthall ne’ebé nia serbisu halo transformasaun husi kasete ba anolog ba RTTL, E.P nomós halo arkivu ba TATOLI nian,” Sekretáriu Estadu Komunikasaun Sosiál Expedito Dias Ximenes hateten ba Jornalista sira, hafoin halo audiénsia públika ho Komisaun G ne’ebé trata asuntu Edukasaun, Juventude, Kultura no Sidadania iha Parlamentu Nasionál, Segunda ne’e.
Notísia relevante : SEKOMS koopera ho CI sei fasilita formasaun jornalizmu investigativu ba jornalista sira
Membru Komisaun G husu ba ekipa husi SEKOMS atu garante nafatin kualidade informasaun tuir nia papél.
Sekretáriu Estadu dehan, Governu iha 2026 hamutuk ho Konsellu Imprensa sei fó formasaun ba jornalista sira ho karakter investigativu atubele kompreende utilizasaun rede sosiál no plataforma, inklui formasaun ba mídia konvesionál liliu kanál ofisiál RTTL, E.P
“Prezidente Komisaun G no distintu Deputadu no Deputada sira agradese ba IX Governu liuhusi Sekretaria Estadu Komunikasaun Sosiál ne’ebé hala’o duni knaar ho di’ak, hein katak tinan 2026 bele hadi’a buat balun kona-ba hamate, hamenus no minimiza fake news, desinfomasaun no informasaun hoax ne’ebé la’o,” nia akresenta.
Aleinde ne’e, SEKOMS iha tinan 2026 sei kontinua formasaun literasia sosiál no mediátika ba joven sira ne’ebé hanesan utilizadór telemóvel android, nune’e bele uza internet no espasu dijitál tuir programa tinan oin.
SEKOMS sei kontinua fortifika deseminasaun informasaun, asaun governativa nomós tau atensaun nafatin ba mídia estata hanesan RTTL, E.P no Ajénsia TATOLI, I.P.
“Ohin mós Deputadu sira husu atu hadi’a Rádiu Komunidade sira tanba harii husi komunidade sira. Deputadu sira husu atubele promove lian matérna iha kada munisípiu iha programa televizivu, nune’e ha’u hanoin enkontru ho Komisaun G di’ak tebes iha diskusaun ne’ebé di’ak, sira hotu sujere katak atu nune’e ita hotu kontinua halo serbisu di’ak,” nia tenik.
Jornalista : Natalino Costa
Editora : Julia Chatarina
