DILI, 24 Juñu 2025 (TATOLI)- Deputadu husi Komisaun B iha Parlamentu Nasionál ne’ebé trata Asuntu Negósiu Estranjeiru, Defeza no Seguransa, Natalino dos Santos, husu ba Ministériu Negósiu Estranjeiru no Kooperasaun (MNEK) atu tau-matan ba timoroan sira iha Izraél relasiona ho funu iha médiu oriente ne’ebé agora akontese hela.
“Konforme informasaun iha notísia, ita preokupa tebes ho situasaun ne’e. Entaun, husu ba Governu, liuliu MNEK atu kontaktu ho ita-nia embaxada sira iha rai sira ne’ebá hodi bele tau-atensaun”, nia dehan iha Parlamentu, ohin.
Tuir deputadu ne’e, karik sidadaun timoroan sira sente la seguru, Estadu presiza proteje sira no bele lori fila mai país.
“Ita preokupa haree nasaun Indonézia no nasaun seluk komesa lori fila sira-nia ema”, nia akresenta.
Reprezentante povu ne’e bolu atensaun Governu atu halo artikulasaun ho embaixada no konsuladu iha ne’ebá hodi tau-atensaun no prevensaun ba sidadaun timoroan, liuliu estudante iha Izraél.
Vise-Ministru ba Asuntu Parlamentár, Adérito Hugo, hateten MNEK liuhusi misaun diplomátika akompaña hela situasaun iha terrenu ba sidadaun sira iha ne’ebá no akompaña mós dinámika konflitu ne’ebé akontese.
“Governu akompaña hela no MNEK husi nia misaun diplomátika iha médiu oriente sei haree situasaun, posibilidade halo repatriasaun kazu situasaun kontinua”, dehan.
Iha entrevista entre jornalista Tatoli no estudante timoroan iha sidade Izraél, Tel Aviv, Egas da Silva, dehan sente ladún seguru iha tempu kalan, maibé iha loron situasaun normál hela relasiona ho tensaun funu entre Izraél no Iraun.
“Situasaun manas loos iha-ne’e, maibé ami halo atividade hanesan baibain. Bá eskola no bá serbisu iha tempu loron de’it, iha kalan ne’e mak ita toba la dukur, tanba sira tiru bomba ba malu liuhusi ár ne’e lian barullu”, nia konta ba Tatoli liuhusi telefone, foin lalais ne’e.
Totál estudante timoroan iha Izraél hamutuk 200-resin no alunu sira-ne’e balun hala’o estudu durante tinan rua no seluk tinan ida.
Notísia relevante: https://tatoli.tl/2025/06/19/estudante-timoroan-egas-da-silva-klarifika-situasaun-atual-iha-israel/
Jornalista: Nelson de Sousa
Editora: Maria Auxiliadora
